Nagaland CM, Rio-i anir Deputy CM aser Minister 10 tenangzükba agi

Kohima, Metsüremi (March) 08 (TYO): Tang mezüng Nagaland nung moapu nung lokti matsüngdang Chief Minister tenangzükba agisangji People’s Democratic Alliance (PDA) lenir, Neiphiu Rio asutsü.
Tanü Chief Minister, Rio den NDPP MLA 4, BJP MLA 6, JD aser Independent nungi kaka Rio ministry nung tenangzükba agiogo.
State Angh, P B Acharya-i ketdangsüa Rio, BJP nungi Deputy Chief Minister, Y Patton aser Council of Minister 10 tenangzükba agidaktsü.
Angh-i tang tasen shimba Chief Minister dang Metsüremi (March) 16, 2018 anogo tashi nung senden nung nübo sayutsü metetdaktsü.
Nagaland nung Chief Minister 12-i office kümsük 22 benogo, aser parnok rongnung 2003 küm nungi 2014 tashi kümsük asemben atonga CM inyaksangji Rio dang lir, aser tanü agi pezübenbuba pai CM atema tenangzükba agi.
Tang Odisha Angh inyaksang, S C Jamir-i CM ponguben tashi inyaka lir, aser ibaji nisung kati CM timtiba inyakba asütsü.
PDA teloktep nung züngsem 32 lir, aser iba nungjagi NDPP züngsem 18, BJP 12 aser JD(U) o Independent nungi kaka lir. Election osang sangdongba sülen anogo ka lir Metsüremi 4, 2018 nü Rio-i sorkar akumtsü atema asüngdanga liasü.
Tsüklai (February) 27, 2018 nü election nung NDPP-i BJP den menden 40:20 lemsar toktep aser parnoki menden 30 nung tako angu. Election sülen Rio-i JD(U) züngsem ka aser Independent MLA ka teyari agia küm 15 yimsüsüba party, Naga People’s Front (NPF) atsüngdok.
Ajioda NDPP leniri teloktep party, BJP nem cabinet menden trok aser JD(U) o Independent na nem menden kaka agutsütsüsa akum aser par party, NDPP nembo cabinet menden pezü dang agutsü.
CM aser Deputy CM dak alia Council of Minister 10 nungi tejenpur- JD(U) nungi K Kaito Aye, NDPP nungi CM Chang, NDPP nungi Neiba Kronu, BJP nungi S. Pangnyu Phom, BJP nungi P. Paiwang Konyak aser BJP nungi N. Jacob Zhimomi nunger lir.
Tang mezüngpur minister shimer par pezüji: NDPP nungi retired Director of Rural Development, Metsubo Jamir, taoba mapang NSF Tir aser Independent MLA, Tongpang Ozukum, BJP nungi businessman, Temjen Imna Along aser BJP nungi social activist, V Kashiho Sangtam nunger lir.
Tang mezüngpur rongnung tanubor anaji arishi küm 37, Tongpang Ozukum aser Temjen Imna Along na lir.
Kohima Local Ground (Khouchiezie) ya 1963 küm Luchii (December) 1 nü taoba mapang India Tir, Sarvepalli Radhakrishnan-i Nagaland state jenjang sangdongba tesem lir, aser iba den sendaktepba tanü iba tesem nung sorkar tenangzükba sentong agiogo.
Tang mezüng Central lenirtem aser North East state tem nungi Chief Minister aika medema iba sentong nung denogo. Parnok rongnung Union Defence Minister Nirmala Sitharaman, BJP National Tir, Amit Shah, Union Minister of State for Home Affairs, Kiren Rijiju, Nagaland nungi Rajya Sabha MP, K G Kenye, North Eastern Chief Minister tem- Sorbonanda Sonowal (Assam), N Biren Singh (Manipur), Conrad Sangma (Meghalaya) aser Pema Khandu (Arunachal Pradesh), taoba Nagaland CM, T R Zeliang, NDPP Tir, Chingwang Konyak aser BJP Nagaland Tir, Visasolie Lhoungu nunger densema liasü.
PDA sorkar züngsemtem dak alia tang tasen shimba NPF MLA tema aika iba sentong nung aden.
Tamalenbo sorkar tenangzükba agiba sentong ya Darbar Hall, Raj Bhavan nung ang kanga tongtibang nisungtem aser ketdangsertem jaoka agia liasü, ajisüaka tanbo osangkakettem ajanga nüburtema jaoka agiogo.
Tanü iba sentong nung nisung ajak agi parnok 25,000 shi aden.
Iba sentong tenzüka State Chaplain, Rev Kuzierang Thou-i sorkar tasen atema sarasademja liasü.
Sentong nungsa Naga nunger lanurtemi sobaliba sobutsü nung “King of King’ ken aten.