Election, Election, Election; tesem ajaklen election indang jembir

– R. Imkong Lkr., 4th Mile, Diphupar.

Nagaland nung tesem ajaklen election indang jembia aruba tu 27th Feb 2018 anogo nung tembangogo. Tanübo election mapang nung tu shibai kechi kodaka inyaktet aser koba ama inyaktet asenok ajaki khen asatangdi arungma.
Taoba mapang ita ana January aser February 2018 anogotem nung tu ABAM-i anir asen Ao lima aser tanüngba District ter nung Tsüngrem dang asen Naga lima ajungtsü asoshi asenok ajaki shilem tajung agia sarasadema aruogo. Yamaji aikati shilem tajungtiba agi Election candidate tem yaria aruogo südi, koma ka yaria aru asenok ajaki khen bilemdangdi arungma.
Taoba mapang nung “SAMARO” kentener temi ken nung atenba ama asenok tamangertem ya küm 4 “pezü” kanga junga amanga asüngsashiba kaa aruogo, iba mapang tubo joko tang kodaki ayipa atutsü ama ayimtena ken atener aser asen teka aser tepen “arms” tu kanga junga anük anüka koshia peretshia ken tajung aika tena jokshishia angudang aika mulungjang nung tsa ma, asen medemer tu aser asen kiyonger tubo joko tang ya ajungbena ka asüyonga kodaki ayipa atuba rongnung adentsü ta asen mulungjang nung kanga ayanga nüktzü yima reprangogo.
Saka küm 5 “pungupuba” nung ayaoka aidangbo asen tamang jenjang tu kong kechi nung samaa ao aser memeteti ka samaa ogo, aser election mapang atongdangbo aremshia aliba nisungtem tu tulur, tashir aser takartemisa sen tu taginüba ama reprangteta aruogo aser item sülen tu “Hajera walla” aser sensakertema anidaka ogo. Anungji shibaibo “SAMARO” kentenertemi atenba ken tu nunga, tai-a ta shitet-tsü?
Saka reprangangma, tan-ba election 2018 yabo asenok tamanger aikati Tsüngrem tang azüngashia sen yong asen Naga lima ya yoka machitsü ta tenangzükba agiba tu, kodang election mapang tonga aru, iba tenangzüktepba tu meshimeshia amadok aser election candidate temi sen lema agütsüba agi tenük masüng keleni khen oli aser kelenji khen odangli ta nemtena jajaba pur aika adokogo, ya koda asütsü? Asen nüburtemi sen ya yamai “meim” sapu asü no?
Tanü ABAM dak alaka ano aikati Tir Yimyim “paper” aser “Nagaland Post” nung sen yong pei yimli yoka machitsü indang aibensa zülutsüba aser asenok ajaki azüngba tu amaa dok asü mesüra item ‘O’ tem tu hau ta mali nemtena jajaogo. Saka tanübo Election tu tembanga dokogo, aser aseni yariba candidate-ba tu adokang mesüra tatok, saka aseni candidate tem dang nungi sen aika meshizüka achiba tu agi taküm piyong tebok sünga alitsü masüji nai aser ni kenü kecha meyimlai ka aliba mapang ka nung asen temang nung mesüra kinunger kar dak khen agi maneptettsüsa tashidak tamajung ka adoker aseni election mapang nung candidate-ba dang nungi sen meshizüka achiba dang nung terben agi timba bendenloker Hospital tajung bushia senzütsüsa tatalokba aika ajurutsü mesüra tanga timtem kar ajurutsü menua mali. Kechiyong kar dangibo Tsüngrem nungi terasaba arutsü anendaka lir ta rajemtsüla. Kechiyong temeshi laishiba nung yamai shai angur, kechiyong sen meimbaji tamajung tapu ajak tera lir ta ashir, I-Timoti tapu 6 tekong 10 nungji shai angur.