Pro-tem Speaker inyaktsü atema Mmhonlumo Kikon shim; Metsüremi (March) 13 nü Assembly Speaker indang election agitsü

Kohima, Metsüremi (March) 9 (TYO): Taoba minister aser tang tasen shimba BJP MLA, Mmhonlumo Kikon-i tanü nungi Nagaland Legislative Assembly nung pro-tem speaker inyaktsü atema tenangzükba agi.
Tanü Raj Bhavan nung Additional Chief Secretary, Temjen Toy lia Governor P B Acharya-i Mmhonlumo nem tenangzükba agidaktsü.
Mmhonlumo-i pro-tem speaker ka ama Metsüremi (March) 13 nü budget session ketdangsüa agitsü.
Budget session nung NDPP-i aniba People’s Democratic Alliance (PDA) sorkar nung BJP, NPP, JD(U) aser Independent tem ruling bench nung aser opposition bench nung Naga People’s Front (NPF) züngsemtem asütsü.
Küm pezü sülen tang mezüng atema Nagaland Assembly nung opposition bench nung MLA tem alitsü, kechiyong 12 buba NLA nung Congress züngsem 8 tashi opposition nung liasü saka parnoki leader of the House pusema nungit aser iba sülen parnok ajak NPF nung aden.
Tesüiba küm 15 tashi sorkar ketdangsüa aruba sülen NPF züngsemtem opposition bench nung amentsü.
Taoba Chief Minister, T R Zeliang-i tamakok anguba agizüka NPF-i Assembly nung opposition tajung ka ama shilem agitsü ta ashi.
Budget session mezüng anogo nung Speaker tasen shimtsü aser züngsemtem tenangzükba agitsü, ta tanü Chief Minister Neiphiu Rio-i osangbener den jembidang ashi.
Budget session nung hopta ka shi recess period alitsü aser idangji sorkar taseni Prime Minister Narendra Modi, Union Minister tem aser BJP national lennirtem den ajuruteptsü aser Metsüremi (March) 22 nungi budget session maneni agitsü, ta Rio-isa shisem.
13 buba Nagaland Assembly election nung NDPP-BJP teloktepi menden 30 nung takok angu saka JD(U) aser Independent MLA anati pusema nungitba ajanga parnoki sorkar akümtsü tashi angu.
13 buba NLA nung NPF MLA 26 lir aser tang mezüng atema Nagaland nung shilem agiba National People’s Party (NPP) MLA 2 lir.
Governor-i Metsüremi (March) 13 nü Assembly Speaker tasen shimtsü atema election anogo shimogo. Iba election nung toktepnürtemi Metsüremi (March) 12 anüngdang 12:00 ako tashi nung tenüng agütsütsü akok aser kasa anogo nikongdang 1:00 ako nung tenüng meyipa agitsü akok ta NLA commissioner & secretary, N Benjamin Newmai-i metetdaktsü.