Yisuji dang kikümbang

Kodang kishi ka shibanger, Tsüngremi ano ka lapoktsür ta asenoki teti jembir. Tetezü, asenok tamakok, maaksü aser shisabulu agi sünger alidang, ano tasü aittsüsa asenok nem teimla agütsür. Aji oda, asenoki teti Tsüngremi asen nüngdak ataloktsüsa lenmang lapoktsüba indang tenüngsanga jembir. Tsüngremi lenmang lapoktsüba tetezü asenok nüngdak atema aitli tuguli ta sütettsüsa Tsüngremi kishi lapoktsür. Ajisüaka, asenoki angatettsüba kaji Tsüngremi asen aotsüba kishi lapoktsür masü saka Tsüngremjiang kishi lir. Kechiyong Yohan tapu 10 tekong 9 nung Yisui ashir, “Ni kikümbang, ni ajanga shir aitdir, pa kümzüktsü aser aitli tuguli ta asütsü aser chiyimdak angutsü.” Iba lai o ya jungjunga bilemdangra, Yisui kishi lapoktsütsü ta masü saka Yisujiang kishi. Tetezü, Yisuji kishinüker masü, anungji asen taküm aser tanüla kümzüktsü asoshi iba kishiji lapoknüra Yisu dangi indangindanga aotsüla. Iba lai tekong ya ajanga asenok ajak nem osang tajung ka bentsür arur, kechiyong Yisu ajanga oli aruli ta asüba agi asenok taküm aser tanüla dang kümzüktsü masü saka chiyimdaka angutsü. Tetezü, asenok nüngdak angudak kishiji Yisu lir. Ajisüaka, asenoki Tsüngrem o mangatet ser Yisu dang aseni aginüba angutsü asoshi lenmang mesüra kishi lapokjang ta mepishir. Yohan 14:6 nung shia aliba ama, Yisuiji dang lenmang ser nung lenmang lapokjang ta mepishir. Asenoki asen aginüba atongdang, nüngdak atalokdang, Tsüngremi kishi lapoktsü amato bilemer. Ibayongji, aiben Tsüngremi mulungbabo masü ser nung asenok taginüba aser nüngdak ka atalokdang, asenoki Tsüngremi lenmang mesüra kishi lapoktsüba indang jembir. Asen meketa talokba tensa tiaji asenoki Tsüngremi sayuba lenmang aser kishi ta bilemer, iba jagi aiben asenok Tsüngrem nungi piladaktsür. Ashiko, asenok shiranga alidang mesüra mapa kar nung tamakok angudang, Tsüngremi asenok aotsüba kishi shibangtsüogo ta asenoki bilemtsüa akok. Takok aser temoatsü manung lia arur, ken timtem ajuru nung asenok Tsüngrem nungi piladokbaji, asenoki Tsüngrem o mangatetba ajanga lir. Tsüngremer kishiji shingaia shibangtsü mesüra lapoktsü makok. Nisung tsütsü bilemtsü agibo, alemli tenyartem mapang tenyar Paul aser Sila nati Yisu Khrista tenüng nung ain tashi tulu amshia sayatenya mapa inyaka senzüdang, tena pur obendangertemi tepuokdak ayubaji tena asoshi Tsüngrem mapa inyaktsü atema kishi shibanger amato ka liasü. Ajisüaka, Tsüngremer sentongjibo balaka liasü. Tena tepuokdak ayubaji yangji alirtem dang Tsüngrem temeim osang bener aotsü kishi lapokerba liasü. Tena tepuokdak ayuba agiang, tepuokdak alirtem aser parnok anükertemi Yisu Khrista temeim osang tajungji angashi. Atangji, angashiba dang masü saka tepuokertem anüksang aser par kibong ajunga kümzüka baptiba otsü Tenyar mapa tapu 16 nung shia angutsü. Nisung tsütsübo tangar tesempartemi tepuokdaki odaktsüba aser tenük meremertemi asen mapa ka nokdangbaji kishi ajak shibanga yutsü amai, saka Tsüngrem asenok den lira, asenok kümzüktsü aser chiyongtsü angudak kishiji kodanga meshibangtsü. Asen aitli tuguli ta senzüba kishiji nisungibo mangutsü saka asenok tekümtet, temoatsü aser takok angudak kishijibo Yisu Khristaji lir. Ibaji mangatetra, tangari asenok arishidang mesüra asen mapa nung tamakok angudang, asenoki aginübajiang Tsüngremi mulungba südi ta bilema aibelentsü melamelar asütsü. Yisuji dang lenmang aser Yisuji dang asenok aitli tuguli asüdak kikümbang ta angatetra, koba tia ajurudir ajuruang, item ajakji asen nem Tsüngremi mulungba inyaktsü kishi lapoktsür asütsü. Nisungibo tesemba agi tepuodaki yok saka Tsüngremibo yangji alirtem temulung meyipdaktsütsü Paul aser Sila yok. Tsüngremer kishi ajanga aor aser arurtem taküm nung yamaji aiben ataloktsü. Tsüngrem tenüng sangdi.