Congress-i Rajya Sabha election atema party tem teyari angur

New Delhi, Metsüremi 10 (Agencies): Taruba Rajya Sabha elections nung Congress-i menden kar nung tamakok angutsüa akok, ajisüaka parnoki iba election nung tanga party tem teyari angutsü.
West Bengal nung Rahul Gandhi-i aniba Congress party-i Trinamool Congress teyari angutsü aser Jharkhand nung Jharkhand Mukti Morcha teyari angutsü.
Yashi TMC tongti lenir aser West Bengal Chief Minister Mamata Banerjee-i, lar party-i Congress Rajya Sabha candidate, Abhishek Manu Singhvi yaritsü, ta sangdongogo.
Ano külen Jharkhand Mukti Morcha-i Rajya Sabha election atema Congress den longjemogo. Rajya Sabha election atema New Delhi nung Congress Tir, Rahul Gandhi aser JMM executive president Hemant Soren na senden mena liasü.
Congress-i Jharkhand nung Rajya Sabha menden ana nungi menden ka nungbosa takok angutsü imlar aser Congress Jharkhand in-charge RPN Singh den state Congress tongti, Ajoy Kumar nati kobi melii candidate tenüng sangdongtsü, ta metetdaktsüogo.
Ano Uttar Pradesh nung Congress-i BSP candidate yaritsü, koba ajanga taruba küm Lok Sabha election nung parnok lokteptsü temaitsü sayur.
Rajya Sabha election nung Congress-i candidates 12 toktepdaktsütsü tebilemba lir, ajisüaka tang tashi nungbo parnoki tenüng mesangdong.
Madhya Pradesh nunga BSP-i Congress pusemtsü aser Assam nung Badruddin Ajmal-i aniba All India United Democratic Front-i Congress yaritsü nangzükogo.
Rajya Sabha election sülen Congress lenir, Sonia Gandhi-i opposition party 14 nungi lenirtem chiyunga senden amentsü jaoka lir, aser iba senden nungji 2019 küm Lok Sabha elections nung BJP-i aniba NDA anema parnok lokteper tokteptsü asoshi jembitsü imlar.