Rongchii 15 nungi Intra-state e-way Bill mapa küma inyaktsü

New Delhi, Metsüremi 10 (Agencies): Rongchii (April) 1, 2018 anogo nungi tenzüka linük tesem ajaklen inter-state e-Way Bill mapa küma inyaktsü atema Goods and Services Tax (GST) Council-i agizükogo, ta tanü Union Finance Minister, Arun Jaitley-i metetdaktsü.
Ajisüaka intra-state movement atema e-way bill ji Rongchii 15 nungi tenzüka shilem lemsar inyaktsü aser June 1, 2018 tashi nungbo state ajak ayimjemtsü.
New Delhi nung osangbenertem den jembidang GST Council nung mendenbuba aser Union Finance Minister Arun Jaitley-i, exporters dang nungi saru magitsü atema ita trok atsülangogo, ta metetdaktsü.
June ita tashi Businesses-i summary sales return GSTR-3B file asutsü, kechiyong GST Council-i itemji file asutsü atema ita asem atsülangogo, aser iba mapang nung inyakyim temelaba akumtsü atema Group of Ministers-i asadanga inyaktsü, ta osang angazüker.
Finance Minister, Jaitley-i, Centre aser state tem nungi tax ketdangsertemi iba inyakyim temelaba südaktsüner, ta ashi.
Senden tembangba sülen osangbenertem den jembidang pai, “O tatsü talang ajak lemtepogo. Council-i ita shia single return dang südaktsüner, inyakyim temela südaktsüner, saru mepaidokdaktsüner. Anungji tanü iba atemajibo telemtetba magitet. Tang teinyakdak inyakyim ita asem atsülangogo,” ta metetdaktsü.