Bangladesh Tir Hamid-i Assam & Meghalaya semdang

Guwahati/Shillong, Metsüremi (March) 10 (Agencies): Bangladesh Tir Md Abdul Hamid-i anogo asemnü atema Assam aser Meghalaya semdangba sülen Küptoknü New Delhi-i apusoa ogo.
Tanü Guwahati nung aliba LGBI Airport nung Assam Governor Prof Jagdish Mukhi aser Chief Minister Sarbananda Sonowal nati Abdul Hamid meinoktsü.
Assam aser Meghalaya semdangdang tesüibatem kanga menungraa ait kechiyong Bangladesh War of Liberation mapang ni North East nung iba tesem nunga arua liasü, ta Hamid-i ashi.
“Ni Balat, Shillong aser Meghalaya semdangogo aser item tesem angudang kanga pela” ta paisa ashi.
Bangladesh Tir Hamid-isa Governor Prof. Mukhi aser Chief Minister Sonowal na par linük semdangtsü atema pelashishia jaok.
Kidangertem den tesentaktep tajung ayutsüla aser ibaji terenlok atema kanga tongtipang. Nünati Bangladesh semdangra tesentaktep akangshitsü, ta pai ashi.
Rogonü (Hokolbar) Hamid-i Meghalaya kübok East Khasi Hills district nung aliba Balat yimtsüng semdang. Bangladesh Liberation War mapang pai iba yimtsüng nung refugee camp ka lapokba nung yaritep.
Balat ya India-Bangladesh arrtsü anasa lir aser tanü Hamid-i iba tesem nung alirtem aser refugee camp lapokba nung shilem agirtem den ajurutep.
Bangladesh Liberation War mapang iba camp nung Bangladesh nunger lanur aika jenoka liasü.
“Ni Balat nunger dang kangasa pelar aser ni yangi arua amungba mapang teti bilemteter” ta Hamid-isa ashi.
Paisa Shillong nung Rabindranath Tagore’er ki semdang aser Nobel sempet angur nem tetushi agütsü.
Bangladesh tir Hamid-i anogo pungunü atema India semdanger aser tanga sentong aika liaka pai Amungnü (Deobar) New Delhi nung linük 121 indang International Solar Alliance (ISA) summit nung adentsü.
Hamid den pa kinungtsü Rashida Khanam aser kinungertem dena arua lir.