India jenjang pungobuba nung tembang

Sultan Azlan Shah Cup:
Ipoh, Malaysia, Metsüremi 10 : 27buba Sultan Azlan Shah Cup-2018 Hockey Tournmant nung India team-i 4-1 agi Ireland madak takok anguba sülen asayartem pelatepba noksa nung angur.

Ipoh (Malaysia), Metsüremi 10 (Agencies): Küptoknü (Saturday) Ipoh, Malaysia nung Sultan Azlan Shah Cup asayamung fifth-sixth classification match nung India team Ireland team madak 4-1 agi takok ngutetogo.
Rogonü (Friday) ‘medal atema asayatsüba asoshi asaya nung taoksatsüka, India team-i Ireland team madak 2-3 agi tamakok ngua liasü. Ajisüaka, kanga dang belemer aliba Ireland team madak veteran midfielder Sardar Singh-i aniba team-i koka liasü. Iba asaya nung Ireland nungi asaya ana temangnung timtem aliba ajanga masayatet. Iba asayamung nung India team jenjang pungobuba nung tembangogo.
Iba asaya nung Varun Kumar-i minute(5buba aser 32buba)nung goal ana, Shilanand Lakra-i minute 28buba aser Gurjant Singh-i minute 37buba nung India team atema goal idakja liasü. Ireland team atema Julian Dale-i dang minute 48buba nung goal ka idaktsü.
Asaya mezüngbuba quarter nung minute pezü or Talwinder Singh-i goal ka idaktsütsü merang saka Ireland goal keeper Jamie carr-i nokdanga liasü. Iba sülen minute pungobuba nung India team-i penalty corner ka ngua, iba asaya mezüngbuba goal Varun Kumar-i idaktsü. Ireland team-ia goal ka idaktsütsü asoshi kanga meranga asaya saka goal magütsüteti mezüngbuba quarter tembang.
Tanabuba quarter asaya tatemlen India atema Lakra-i tanabuba goal idaktsü, aser half-time tashi nung India team pur goal ana agi tejakdang liasü.
Half-time sülen asaya tenzüka aoba mapang, goal idaktsütsü asoshi India team-i metetemi meranga asaya. Mapang kobi melei penalty corner ka ajanga Varun-i pa atema tanabuba aser par team atema tasembuba goal idaktsü aser minute pungo dang lir goal 3-0 aliba nungi Talwinder-i goal ka idakja 4-0 kümadok.
Tatembangbuba quarter asaya nung, Ireland team-i goal angutsü asoshi maongka nguteta Dale-i par telok atema goal ka idaktsü.