Aluyimer 30,000 Mumbai tongogo; Vidhan Bhavan nung adenshitsü

Mumbai, Metsüremi (March) 11 (Agencies): Maharashtra nung aluyimertemi takhangba onük balala agüja aluyimer 30,000 dak tema Mumbai yimti tonga jajaa aruogo, aser asüng parnok Sion nung aliba Somaiya Ground nung adenshiba sülen parnoki sangdong kar agutsütsü.
Tentonü (Hombar) parnok south Mumbai-i aotsü aser state assembly-i oa aluyimertem dang sentsüh atoktsü, alu nungi züsentetbatem nung jenjang yanglushitsütsü aser Swaminathan Commission-i benokba onüktem mapa küma inyaktsü atema takhangba agutsütsü.
Tang state legislature senden tagidak mapang ka nung parnoki iba sentong ya ayongzükogo.
Longkak aitba sentong ayongertemi ashiba agi, longkak aiter aluyimer parnok ajak agi 34,000 jungogo, kechiyong tanü Mumbai nung aluyimer meyirjang aika longkak aitertem rongnung densemogo.
Iba dak sendakba nung mepetmesü madoktsü atema Mumbai police-i security tashi itshiogo. Ajisüaka sensotemi timtem terabo angutsü südi, kechiyong tang HSC, SSC, CBSE (Class X aser XII), ICSE aser ISC tadidang tagidak lir.
Iba sentong ayongba telok, All India Kisan Sabha (AIKS)-i, aluyimertem den külemi parnok kinüngtsürtem aser tsüraburtem densema longkak aitba nung shilem agitsü, ta metetdaktsü.
Yashi All India Kisan Sabha lenir, Ajit Nawale-i, “Parnoki akhangbaji tim dang, mesüra parnoki lenmang talangka tetsüng agi mejajatsü,” ta ashi.
Maharashtra state sorkar nung BJP den teloktep, Shiv Sena aser MNS natibo aluyimertem sentongji nungittsü, ta shiogo.
Uddhav Thackeray tetuyuba nung ajemdaker yashi Shiv Sena lenir, Eknath Shinde-i Shahapur nung longkak aiter aluyimertem ajurua liasü.
Yaküm Maharashtra sorkari farm loan waiver scheme kübok mezüngbuba shilem nung aluyimertem dang sentsüh sen crore 4,000 atoktsü sangdonga liasü.