Priyanka künati kübu tepsetertem dang tai tokogo: Rahul Gandhi

Kuala Lumpur, Metsüremi 11 (Agencies): Taoba mapang India Ato kilonser, Rajiv Gandhi tepsetba sülen küm 27 jungnüa arudang par jabaso aser Congress Tir, Rahul Gandhi-i, teno Priyanka Gandhi Vadra tenati tebu tepsetertem dang tai tokogo, ta ashi.
Yashi Singapore nung IIM nung tamalen azüngertem den jembidang Rahul-i, “Kübu tepsetertem dang onoki tai tokogo. Kechi kuli südir süaka ni raraba tapu ajak maginer,” ta ashi.
Rahul-isa, kenü anogobo tebuji tepsettsü ta parnoki meteta liasü, ta ashi.
“Kübu asütsü ta onoki meteta liasü. Ozü otsüla asütsü ta onoki meteta liasü. Yimtenren nung kodang tamajunger den küptepa nai langka tajung atema nokdakdir na asütsü. Ibaji tejangja,” ta paisa ashi.
“Kütsüi (otsüla) kü dang la asütsü ta ashi, aser ni kübu dang na asütsü ta shir liasü,” ta pai ashi.
“Onok küm aika melung yirua aser jashia liasü. Onok kanga mepelai liasü. Ajioda süaka tangbo khenyongi onoki tai tokogo,” ta paisa ashi.
1991 küm May 12 nü Tamil Nadu nung election nüboyim senden tulu ka alidang Sri Lanka nung Prabhakaran-i aniba telok, LTTE nungi tetsür suicide bomber kati Rajiv Gandhi pokseta südaktsü.
Ano 1984 küm October ita nung taoba mapang Ato kilonser, Indira Gandhi-a la anüker security guards-i khaseta liasü.
“Kütsü (otsüla) khasetba mapang nung ni arishi küm 14 liasü. Kütsü khasetertem den ni badminton sa asaya liasü. Iba sülen kübu tepset. Teti nisung 15-i longbanger alitsüji maongka ka masü. Yamaji alitsüji kanga tasak,” ta pai ashi.
Yaküm Luchii (December) ita nung Amethi nungi MP, Rahul-i tetsü, Sonia dang nungi party Tir menden agizüka liasü.