EC-i Aadhaar- voter ID sendaktepner

New Delhi, Metsüremi 11 (Agencies): Election Commission (EC)-i temepishiba shidi ka ajanga Supreme Court dang Aadhaar aser Voter ID cards sendakteptsü atema benokogo.
EC-i, Voter ID card, Aadhaar den sendaktepba ajanga vote agutsüba nung ochimashi inyakyim nokdangtettsü aser nisung kati vote ka dang agutsütettsü, ta ashi.
Tamalena EC-i voter cards ajakji Aadhar den sendakteptsü atema benoka liasü, ajisüaka 2016 küm AK Joti-i Chief Election Commissioner (CEC) mapa agizükba sülen iba tebilemba nungjagi atsüngadok.
Tang tashi nung Aadhaar numbers crore 32 voter ID cards den sendaktepogo, ta tang teinyakdak Chief Election Commissioner, O P Rawat-i metetdaktsü.
Bengaluru nung 14buba National Conference of the Association for Democratic Reforms (ADR) senden tembangba sülen osangbenertem den jembidang Rawat-i, “Tang tashi nung Aadhaar numbers crore 32 voters’ ID cards den sendaktepogo. Supreme Court nungi telangzüba anguba sülen ano crore 54.5 sendakteptsü,” ta metetdaktsü.
Aadhaar number crore 54.5 sendakteptsü atema mapang kobika agitsü? ta asüngdangba langzüdang Rawat-i, “Crore 32 sendakteptsü atema onoki ita asem dang agi,” ta ashi.
Tang Aadhaar dak sendakba onük ajak Supreme Court indang Constitution Bench ka nung benoka lir.