France investment ajanga rongsenkettsüng ajungkettsü: Suresh

Ahmedabad, Metsüremi 11 (Agencies): Tanü Commerce & Industry Union Minister, Suresh Prabhu-i, France-i India nung sen aika indoka shishilembatsü tebilemba lir, aser ibaji ajanga linük nung technology aser rongsenkettsüng jenjang tajungba akumba den külemi lanurtem atema mapa aika adoktsü, ta ashi.
Yashi New Delhi nung Prabhu-i France nungi ketdangsertem ajurua liasü.
Union Minister-i, India nunger ‘strategic partner’ France ya technology tsütsü kanga advanced linük ka lir, aser iba linük den tesendaktep ajungba ajanga India linük lenla aika nung yaritsü, ta ashi.
New Delhi nung osangbenertem den jembidang pai, “France ya asen strategic partner lir. 1998 küm asenoki nuclear bomb tendangba sülen France-i asenok nungita nokdaker. France-i asenok asalentong aser technology tsütsü yariogo, kechiyong parnok ya technology tsütsü kanga advanced linük ka lir,” ta ashi.
Prabhu-i France nungi shishilembaba ketdangsertem ajurua liasü, aser parnok rongnung minister tem aser industry lenirtem densema liasü.
“Parnok indang technology shisatsü amshia parnoki linük nung sen aika indoka inyaker. Ibaji ajanga India nung Technology aser rongsenkettsüng alitsü aser mapa aika adokdaktsütsü. Anungji France den tesendaktep tashi itshiba ajanga asen linük lenmang aisü nung ajangzüktsü,” ta pai ashi.
Yashi India aser France nunger company tem tsüngda aser sorkar tsüngda Euro sen billion 13 shi jenjang indang tezüngzüktep aika agiogo.