Mkg nung IPPI 2018 tanabuba round agiogo

Mokokchung, Metsüremi 11 (TYO): India linük tesem ajunga den külemi Mokokchung district nunga polio virus anema tanü Intensified Pulse Polio Immunization (IPPI) drive tanabuba round agiogo.
Dr.Yanger DPO (RCH & UIP) mendenbuba ser Imlong Place, Mokokchung nung iba sentong tenzüka pai IPPI indang tongmelang agi metetdaktsü, iba sülen CMO, Dr. S.S Akaba-i sarasadema liasü.
Iba anogomong sentong nung jembidang Mokokchung DC, Sachin Jaiswal-i, India nung polio agi shirangba case mali, ajisüaka polio free country ta sangdongtsü atema arishi küm 5 ser tekübokpur tanurtem nem bOPV vaccine agutsür, kechiyong kidanger linüktem nung polio agi shirangba case lir, aser bendangertemi iba tashidakji linük telungi bener aittsüa akok, ta ashi.
Paisa medical staff tem dang IPPI sentong kübok arishi küm 5 ser tekübokpur tanur ajak ayimjemtsüsa inyakang, iba denji külemi tanurtem nem polio agutsütsü asoshi nübo, materials aser equipment peria agüjang, ta metetdaktsü.
Iba programme tenzükja Mokokchung DC-i mezüngbuba polio drops ji tanur ka nem agutsü. Kasa sentong nung Dr.S.S.Akaba CMO, Dr.Kibang Deputy CMO, Dr.Longai Deputy Director Directorate of Health & Family Welfare, DPO aser Social Welfare, Education Department, UNDP nungi ketdangsertem, Rotary club, Red Cross, DPRO, Health workers aser volunteer tem dena liasü.
District nung tanur 9629 nem polio agutsütsü atema polio booth 202 amenoka liasü.
DPO-i sangdong ka ajanga, mezüngbuba anogo nung tanur 8473 nem polio agutsüogo, aser Metsüremi 12-13 anogotem nung tanüngba tanurtem nem kibok shia tua polio agutsütsü, ta metetdaktsü.