MLA temi gari lenmang tia metettsüla

– Among P. Aier

Küptoknü (Honibar) Nagaland nung MLA kari parnok nem Renault Duster gari masü saka Toyota Innova Crysta gari ang alijang ta tezüluba ka Nagaland assembly nung commissioner & secretary nem agütsüba osang angazüker. Nagaland ama tenem-tekong alidak Duster gari junga manishiteter aser iba jagi parnoki Innova Crysta gari ang aginür ta MLA kati ashiba asenokisa angashiogo. Hao asenok meimchirtemi olioratsü aser mapang magii senzüsenbongtsü atema gari nüngdaker aser talisa tanü putu nung asenok atema gari ya kanga dang tongtipang nüngdak rongnung ka kümogo. Nübortemi MLA temji asenok tenüng nung noktaktsü atema tenüng jateta shimtet, anungji parnok nem tang nüngdakbatem agütsütsü tim aser ibaji asü nung dang parnok tetsükdaktsü kecha melii mapa inyaksangshitettsü aser taküm liyonga otettsü. Ajisüaka, MLA temi kechiba sen paika jenjang indang gari jiang aginür ta kanga rata bilemer aser süngmanger. Nagaland ama sensaker state ka nung aser talisa Centre dak dang metaloker senotsü teyari agia sorkari kechisarena ajak inyaka aruba state ka nung kodaser MLA temi iba amai nüma tanga jenjang tasak indang gari meshir ta ratar. Tanga takar state tem nungbo yamaji amshiya alitsü südi, saka asen state jenjang dak alangba ang amshi nung tajungba südisü ta bilemer. Hao, MLA temi gari kanga nüngdaker kechiyong pai gari nungji mener mapai oli aruli ta senzütsü, par constituency sema senzütsü, mapang meindoki senzüsenbongtsü aser nisung teimba den ajurutepteta senzütsü akok. Ajisüaka, ibaji Tata Nano amala jenjang dalang garitem mesüra sen lakh 4-5 jenjang gari mashi katia akoktsü nung kechiba sen lakh 13 shi alangba Renault Duster dang nungi ano sen lakh 22 dak tema jenjang Toyota Innova Crysta gari ang amshinür. Iba jagi sayur, parnoki gariji senzüsenbongtsüba atema dang masü saka parnok sentsü aser jenjang sayutsü atema amshinür. Gari tulu ka aser tajung ka nung mener senzüba ajanga paji tongtipang nisung ka tamaitsü sayutsü atema dang amshinür südi ta bilemer. Ajisüaka, asenoki jungjunga bilemdangra Nagaland nung aliba gari lenmangtem nungbo tanga garitemji ajak toktsür akhidang amshiba Jeep gari ama tu ang amshitsü temsüa lir. Akhidang amshiba Jeep gari den tera tajungba ka amshinüra Maruti Gypsy gari tashi ka dang timi amshitettsü südi. Duster gari mamshiteter anungji Innova Crysta gari ang kua ta tatemtsü amer gari meshiogo saka Innova Crysta garijia mapang tatsüka amshia orrbo asen state nung aliba gari lenmang denbo mapet ta kuli angutsü ana nung lir. Anungji MLA temi jenjang tasak garitemji amshinüra, tang alia mamshii atar tamasa gari lenmangtem ya ang yanglutsüla. Iba sülen jibo MLA temi sport(s) utility vehicle (SUV) jenjang tasaktem toktsür sports car tema alia amshitsü akok. Ajisüaka, tamasa Nagaland state nung gari lenmang tia jungjunga metettsü atema MLA temia SUV amala gari tajungtem nung masü saka tilartem ama gari tamajung aser jenjang dalang garitem nunga mener senzüdangtsü nüngdaker. Nagaland nung tawa tasen tentetba Peoples Democratic Alliance (PDA) sorkari mezüng cabinet senden amenba sülen Nagaland nung VIP sobaliba agientsü ta ayimoktsüogo. Iba osangji kangasa tajung aser nübortemi mapang talangka tejakleni nungi anganüa aruba osang ka lir. Anungji, Nagaland nungi VIP sobalibaji atangji agientsü atema tenzüker süra state sorkari tamasa MLA tem nungi tenzüka VIP sobalibaji agientsü merang nungbo Nagaland nung temelenshiji arur ama asütsü.