Samsung 4K QLED TV tasentem India nung Monupii sayatsü

Metsüremi 11, 2018 (Agencies): QLED TV series India nung 2017 küm sayar ita ka tsüngda nung kanga junga shishilembaba sülen Samsung puri tawa sayaba 4K QLED series India nung taküm quarter tanabuba nung sayatsü. Samsung Electronics company puri parnok indang 85-inch, 8K Artificial Intelligence (AI)- keta aliba QLED (Quantum dot Light Emitting Diode) TV tem Rasemnü sayaogo.
Iba Samsung TV ya alima ajunga nung Metsüremi tatemlen angutsü aser India nung Monupii tatemlen nungi angutsü. Company senior executive temi ashiba agi, India shishilembadak iba TV kanga junga ayoktsü, kechiyong TV ayokba tsütsü inch 40 nungi tema TV tem shishilembaba linük nung kanga kara kara renloka odar aser iba segment nung Samsung company temaba jenjang nung lir.
2017 küm TV category ajak ayokba nung Samsung pur shilem 30 liasü aser premium TV category nung parnok shilem 50 liasü. “World-class technology aser customer-centric innovations agütsütetba ajanga onok iba segment nung maneni temaba jenjang nung alitsü, ta onoki amanger,” ta company executive temi osangbenertem dang ashi. India nung Samsung pur indang factory ana, R&D centres pongu aser design centre ka ta lir, aser iba nung nisung 70,000 anioka mapa inyakdaktsüdar.
America nung Samsung Electronics, Consumer Electronics senior Vice President Dave Das-i ashiba agi, “nüburtemi action aser sports nunger amala reprangtsüba atema screen tuluba aginer, ajisüaka screen tuluba kümaka living room bo kasa dang asür.”
“Onok indang QLED technology ajanga screen tulu nung süaka space kasa nunga tajangshiba tajung agütsür,” ta paisa ashi.
2017 küm QLED series TV tem sayaba sülen ita ka tsüngda India nung rakteba jilia mekaa ayuba nguogo aser taoksatsükaji item jilia mekaa ayur rongnung shilem 40 bo non-metros tem nungi liasü. Küm 12 tashi South Korean company ya TV shishilembaba tsütsü alima ajunga nung temaba jenjang nung lir.