Bajrangi Bhaijaan film-i China nung sen crore 150 dak tema aazükogo

Metsüremi 11, 2018 (Agencies): Bollywood nung nüngtugu actor Salman Khan-i tongti shilem agiba film Bajrangi Bhaijaan China nung sayar tang tashi nung sen crore 150 aazükogo. India nung iba film sayar küm ana lir China nung taküm Metsüremi (March) 2nü sayaa liasü. Salman indang film tang mezüngbuba China nung sayaogo kong nüburtemi Aamir Khan indang film tem kanga sapua repranger.
Iba film yanglurtemi sangdong ka ajanga ashiba agi, film ya bendanglen shishilembadak kanga takok ngua odar. “Eros International aser Salman Khan indang ‘Bajrangi Bhaijaan’ film China nung Küptoknü tanabuba kanga junga odar aser USD million 3.35 aazükogo. Tang tashi nung iba film ajanga China nung USD million 23.11 (sen crore 150.70) aazükogo,’ ta kasa sangdong ajanga metetdaktsü.
Kabir Khan-i direct asüba film ajanga Hindu nunger kati Pakistan nunger tetsür chanu ka lar linüki meyipa anir otsüba indang otsü ashir. Iba film nung tanutsüla ya o mejembiteti adoker. Film nung tena India nungi Pakistani aoba indang sayur.
Iba film nungsa Harshaali Malhotra, actors Kareena Kapoor Khan aser Nawazuddin Siddiqui nungeri tongti shilem agiba angutsü.
Bajrangi Bhaijaan film China nung sayar mezüngbuba anogo nung sen crore 18 aazüka liasü.
Chinese box office ajanga ashiba agi, film sayar mezüngbuba anogo nung ‘Bajrangi Bhaijaan’-i Aamir indang film Dangal dang nungi sen timtiba aazük, ajisüaka Secret Superstar film koba ajanga mezüngbuba anogo nung sen crore 40 aazüka liasü, iba film bo memenep.