Sitharaman-i China semdangtsü

New Delhi, Metsüremi 12 (Agencies): Tanü Union Defence Minister, Nirmala Sitharaman-i, kobi melii lai kidanger linük, China semdangtsü, ta metetdaktsü.
Tanü New Delhi nung seminar ka aliba mapang nung osangbenertemi asüngdangba ka langzüdang lai, “Atangji ni Rongchii (April) ita tatemlen (China) semdangtsü,” ta ashi.
Ajisüaka lai China semdangba mapang nung kechi onüktem nungsa o lemteptsüar ibajibo memetetdaktsü.
Yaküm June ita nung China-i Bhutan nunger litsü nung gari lenmang yanglutsü meranga liasü, ajisüaka India sepaitemi nokdangba ajanga anogo 73 tashi linük ana sepaitem tsüngda rara adoktsüsa liasü.
June 16 nungi linük ana sepaitem tsüngda rara adoktsüsa tensa tenzük aser August 28, 2017 nü linük anapronglai sepaitem iba aesem nungjagi agientsü melungtepa sangdong.
Yaküm Luchii (December) ita nung External Affairs Minister, Sushma Swaraj aser China Foreign Minister, Wang Yi na senden amendang India-i, linük ana tesendaktep junga alitsü atema India-China arrtsülen yimjung alitsü nüngdak, ta jembia liasü.
Wang-ia, sepaitem tsüngda rara adoktsüsa aliba ajanga linük ana tesendaktep nung kongshi, ta ashi.
Yaküm Luchii ita nung Indian National Security Adviser, Ajit Doval aser Chinese State Councillor aser Central Committee of Politburo of the Communist Party züngsem, Yang Jiechi na 20buba Special Representatives of India & China on border issues senden nung dena liasü.