Modi aser Macron nati UP nung solar power plant semzüktsü

Metsüremi 12, 2018 nü Mirzapur (Uttar Pradesh) nung Solar Power Plant semzüktsüba sülen Ato kilonser,  Narendra Modi aser France Tir, Emmanuel Macron nunger tangokba noksa nung angur. 

Dadar Kalan (Mirzapur), Metsüremi 12 (Agencies): Tanü Uttar Pradesh, Mirzapur District kübok Dadar Kalan yimdak Ato kilonser, Narendra Modi aser France Tir, Emmanuel Macron nati state nung solar power plant tulutiba semzüktsüogo.
Ato kilonser-i Kurta Pyjama aser Macron-i suit tanak ka sema liasü, ajisüaka tenapronglai tekong nung sentsü temeremso ‘scarf’ naia liasü.
Power plant semzükba sentong nung tena minute 20 shi aden.
Kasa sentong nung Uttar Pradesh Chief Minister, Yogi Adityanath den kanga tongtibang nisung aika dena liasü. State nung iba ya power plant tulutiba lir, koba ajanga electricity 75 MW adokdaktsütsü.
Power Plant lungzüng lapokja sayaba sülen Modi aser Macron nati teka amteper noksa tangokdaktsü. Macron-i lokti dak teka ayiploktsü aser Modi-i temeyong agi takok anguba temaitsü sayua liasü.
Iba sülen tenati India aser France ketdangsertem ajuru. Iba power plant nung France nunger company-i solar panels lakh 1.18 amenoka lir, koba ajanga küm shia electricity unit crore 15.6 adokdaktsütsü.
Maneni tenati power plant matsüngdang noksa ka tangokba sülen Varanasi yimtii ao.
France Tiri anogo pezünü atema India semdanga lir, aser iba mapang nung linük ana tsüngda tezüngzüktep 14 agiogo.