ISSF Word Cup medal tally nung India timba nung tembang

New Delhi, Metsüremi 12 (Agencies): Guadalajara, Mexico nung ISSF (International Shooting Sport Federation) World Cup asayamung final nung India nungi asayartemi medal ka danga mengutet saka iba asayamung nung India teloki tajungtiba nung shilem agia asayaba ajanga gold medal pezü, silver medal ka aser bronze medal pezü tashi ngua jenjang temaba tongtetogo.
Mezüngbuba International Shooting Sport Federation (ISSF) World Cup asayamung taküm asayaba tebur ‘Skeet’ final nung Olympic champion anaben angusang America nunger Vincent Hancock-i takok ngutetogo.
Iba ‘Skeet’ telemsa nung India nunger asem, Smit Singh-i qualifying round nung point 116 ngutetta jenjang 15buba tongtet, Angad Bajwa-i point 115 ngutetta jenjang 18buba aser Sheeraz Sheikh-i point 112 ngua jenjang 30buba tongtetta liasü.
Ajisüaka ISSF tetoktepa nung India teloki taküm mezüngbuba medal tally nung temaba jenjang nung tembang. Iba asayamung nung India-i ajak senteper medal toku ngutet.
Beijing aser London Olympics asayamung nung gold medal angusang, America nunger Vincent Hancock-i 2015 World Championships nung takok ngua asayaba ama iba asayamung ‘skeet’ final nung kanga jungabo shilem magitet. Qualification atema asaya nung Hancock-i point 125 nungi 123 tashi tonget aser final asaya nung pai point 60 nungi 59 ngutetta record yanglu saka pa den tokteper Australia nunger Paul Adams-i menepa asaya liasü aser tatemsa ‘shoot-off’ nung Paul-i 6-5 agi Hancock madak temaba jenjang nung khateta gold nung tembang.
Iba kasa tetoktepba nung Italy nunger Tammaro Cassandro-i point 49 ngua silver medal angu.
Iba ISSF asayamung tatembangbuba nung takok monguaka, India tepela nung kidangi shilangtsü.
Iba asayamung nung India nuger Shahzar Rizvi, Manu Bhaker, Akhil Sheoran aser Om Prakash Mitharval nungertemi gold medal angu, Anjum Moudgil-i silver ka ngutet aser Jitu Rai aser Ravi Kumar nati bronze medal pezü ngutet.