Barcelona den timatemtsü Chelsea renema alitsüla: Conte

London, Metsüremi 12 (Agencies): Champions League quarter-finals-i aitsü asoshi maongka lira, Chelsea ya Rasemnü Barcelona nung timatemtsü renema alitsüla, ta manager Antonio Conte-i ashi.
Taoba ita Stamford Bridge nung mezüng leg asayaba mapang Chelsea midfielder Willian-i goal ka agütsü, saka Barcelona nungi Lionel Messi-i minute 75buba nung iba goal küpzükteta liasü.
Nou Camp nung Chelsea-i ponguben tashi European champion bena aliba telok den asayatsü ya kanga temelabo masütsü, ta Conte-i ashi.
“Asenok kanga tajung asütsüla saka iba ama telok den asayadang, alima nung tajungtiba team (Barcelona) den mezüng leg nung ama na timatemtsü renema alitsüla, kong onok kanga junga asaya,” ta Conte-i www.chelseafc.com nung shia lir.
“Chelsea ya asayar tejen aikabo mali, onok rongnung asayar aika Champions League mezüngbuba mesüra tanabuba season ang asayar lir. Saka onoki telok ka ama inyaktsüla aser mapang nung timatemtsü renema alitsüla, aser mapang ajak nung goal agütsütsü maongka lir ta bilemtsüla,” ta pai ashi.
Mezüngbuba leg nung possession timba Barcelona-i amokbanga liasü saka Conte’er telok nungi Willian-i mezüng asaya shilem metembangdang goal anaben yoktsü merangba goalpost nung ondak.
“Pei tesem nung asayadang asen den asayar nem possession amokbangdaktsütsü jenjang agütsüba ajanga asenoki tatasaba aser bendanga agütsür maongka angutsü ataba nüngdaker aser iba maongka angudang agitettsüla,” ta Conte-isa shisem.