PM Modi-i Mary Kom indang Academy lapoktsütsü

New Delhi, Metsüremi 12 (Agencies): Imphal nung Metsüremi (March) 16, 2018 nü Ato Kilonser Narendra Modi-i ‘Mary Kom Regional Boxing Foundation’ lapoktsütsü aser iba sentong nung Olympic medal angur, boxer Vijender Kumar aser wrestler Sushil Kumar nungera adentsü.
Manipur yimtiba Imphal anülulen aliba Langol tenemtsüng nung Mary Kom indang Boxing Academy ya ali tasazük acres 3.3 nung yanglua lir aser Imphal nungi kilometer 10 shi bilar lir. Iba reju nung tang boxing asayar 45 tashi lir aser item rongnung tetsür 20 lir.
Iba ali ya Manipur sorkar ajanga 2013 nung agütsü aser iba reju ya National Sports Development Fund (NSDF) nungi senotsü teyari agüja yanglu.
“Iba saisapong angazükdak tesem yanglutsü asoshi 2006 nung sentong yangluba sülen küm aika timtema arur asangsang küma tenzüktetba atema central aser state sorkar dang kanga pelar,” ta sangdong ka ajanga ashi.
“Boxing asaya ajungkettsü mechi iba ki Mary Kom Regional Boxing Foundation nem agütsüba asoshi PMO dang kanga pelar,” ta kasa sangdong nung shia lir.
Linük nungi tetsür boxer rongnung Olympic medal nguteterbo World aser Asian champion ponguben bena alila, Mary Kom ya dang lir. Lai iba takok ya London nung 2012 küm bronze medal ngutet.
Arishi küm 35 tain, Mary Kom-i Asian Games nung gold medal nguteta la wadang nung kanga junga jenjang tajung tongteteba ajanga küm ishika tejakdang International Boxing Association (AIBA)-i la nem ‘Magnificent Mary’ nüngja jaloktsü.
La taküm nung temelenshi balaka aruba ya 2016 küm Rajya Sabha nung züngsem akümba aser iba sülen Asian Championship gold medal pongububa koktetba ya alitsü.