NIA-i taoba CM TR Zeliang dang asüngdangya asütsü

Kohima, Metsüremi (March) 12 (TYO): Sorkar department tem ajanga ozüngi noktanga aliba telungpur teloktem nem senotsü agütsüba dak sendakba nung asüngdangya asütsü atema National Investigation Agency (NIA)-i Chief Minister T R Zeliang jaokogo.
“Iba ken o ya NIA DSP Jasveer Singh-i bushisüngdanga aruba nung nai shilem agiba ama bushitetogo” ta DSP NIA, Union Ministry of Home Affairs, Yogesh Rathore-i Zeliang dangi züluba shidi nung shia lir.
NIA-i TR Zeliang dang Metsüremi (March) 17 anepdang 10:00 ako nung New Delhi nung parnok den ajuruteptsü tetuyuba agütsü.
Shitakbabo NIA-i TR Zeliang dang asüng parnok den ajuruteptsü tetuyuba agütsü saka TR Zeliang-i State Assembly session tenzüktsü aliba atema anogo atsülangtsü mepishi aser ibaji agizüka NIA-i anogo melenshi.
Tsüklai (February) 15 nü NIA-i Chief Minister’s Office (CMO) Nagaland nungi ketdangser asem dang asüngdangya asütsü atema jaok.
Par asemji OSD to CM Ruokuovizo Chupuo aser Media Officers – Karaibo Chawang o Kueirang nungertem lir aser parnoki Guwahati nung NIA Deputy Superintendent of Police and Chief Investigating Officer, Jasveer Singh den ajurutep.
Nagaland Assembly Election result adoktsü anogo ana dang lia Metsüremi (March) 1 nü TR Zeliang den inyakba ketdangser ka dang NIA-i New Delhi nung anogo pungunü (Metsüremi 3 nungi 7) tashi asüngdangya süa liasü.
Tanü Press Secretary to TR Zeliang, Azeu Namcyn Hau-i sangdong ka nung ashiba agi, NIA-i TR Zeliang jaokba osangji yasüng ayaterm nunga fax ajanga angu aser iba asoshi TR Zeliang-i NIA dangi shidi ka nung mapang tatsüka tsüngda pa marutettsü aser ano Assembly Session nung pa Leader of Opposition ka ama shilem agitsü lir asü nung marutettsü ta shiogo.
Luroi (August) 2016 nungi tenzüka NIA-i Nagaland nung tashiyim agi sen saruba ken o tem bushisüngdanga arur aser TR Zeliang-i ozüng akhümtsübuba senso tajung ka ama NIA dena Investigating agency mashi ka den yariteptsü mulunga lir. Ajisüaka, TR Zeliang lenisüba kübok taoba Chief Minister’s Office-i ozüng noktanga aliba telok shinga dena senotsü agütsütepa mali, ta Press Secretary-isa metetdaktsü.
Mezüng anogo nung yaritepa aruaka, asüngdangya asütsü atema jaokba nung taitsü keta lir aser iba nung yimtenren teka dena lir ama temulung melemi bilemer, ta Azeu-isa ashi.
Ano külen, Press Bureau, Naga People’s Front, Central Headquarters-ia sangdong ka nung National Investigation Agency (NIA)-i yimten mapa inyaker ta tai tongloktsü.
Shitakba agibo NIA-i linük nung kiralongraba indang mapa repranger saka parnoki yimtenren mapa inyaker ama ajiteter, ta Press Bureau sangdong ka nung ashi.
NPF-i tai apuba onük asemji- NIA-i TR Zeliang dangi osangji Metsüremi (March) 12 ayaterm 12:15 ako nung kanga dang aritepa yokba. Tanabuba nung, Metsüremi 13 nungi Nagaland assembly indang mezüngbuba session agitsü sentong lir ta NIA-ia meteta liaka kasa anogo nung pa jaokba aser tasembuba nung TR Zeliang-i chief minister menden toktsüogo ta metetsümonga Chief Minister’s Office dangi fax yokbatem lir.