Ita ana tsüngta Pakistan-i ceasefire raksaba 633 ben lir

New Delhi, Metsüremi 13 (Agencies): Küm tenzüker mezüng ita ana tsüngta Jammu & Kashmir nung aliba LoC aser International Border nung Pakistan-i ceasefire nung aibelena mitkar 10 aser civilian 12 tepsetogo, ta Lok Sabha nung Sangtennü metetdaktsü.
Taküm Tsüklai (February) tashi nung Jammu & Kashmir nung aliba Line of Control (LoC) nung Pakistan-i ceasefire raksaba 432 ben aser International Borden nunga ceasefire 201 ben raksa, ta Union Minister of State for Home, Hansraj Gangaram Ahir-i ashi.
2017 küm LoC nung Pakistan-i ceasefire nung aibelenba 860 ben aser Jammu & Kashmir nung aliba IB nung aibelenba 111 ben liasü, ta tezüluba nung asüngdangba ka pai langzüdang ashi.
Taküm küm kisüng nung civilian 12 tepset aser 59 yiru, ta Ahir-isa ashi.
Item lendong nung Army trok aser tanga sepaitem 18 taküm sama. Ceasefire raksaba lendong timtem atalokba mapang BSF pezü taküm sama aser 22 yiru, ta pai metetdaktsü.