DGCA-i IndiGo indang tayimtsü aika anentsü

New Delhi, Metsüremi 13 (Agencies): Directorate General of Civil Aviation (DGCA) ajanga IndiGO aser GoAir indang Airbus A320neo tayimtsü 11 soiter anogo ka lir lenmang balala nung jajaba IndiGo indang tayimtsü 47 tashi athi. Item tayimtsü nung amentsü asoshi ticket alia alirtem nem sen tali magütsüi tanga tayimtsü nung amentsü mesüra ticket mükaa aliba asoshi sen shidak meyiba meshitsü atema maongka agütsü, ta company ajanga ashi.
“Nüburtem kümzüktsü mechi DGCA-i onok tayimtsü soitba ajanga IndiGo-i tayimtsü khar athitsüsa aküm. Iba ajanga passenger aika nem timtem agütsütsü ta onoki angateta lir. Saka Tesem kati tayimtsü aika aor asünung iba temelenshi agi kongshia aliba passenger tem tanga tayimtsü nung yoktsü asoshi kanga yakyaka maparen inyaker,” ta company ajanga sangdong ka nung metetdaktsü.
Tentonü DGCA ajanga A320neo aircraft nung PW1100 engine alibatem anentsü totuyuba agütsü. IndiGo tayimtsü nung aliba engine mapa meinyaki ajungbena Ahmedabad nung anenba osang angashia aviation ketdangsüba teloki iba telemtetba ya agi.
Nüburtem kümzüka ayutsü mechi, DGCA ajanga Tentonü IndiGo aser GoAir dang Pratt & Whitney 1100 engine inoka aliba A320neo tayimtsü 11 athitsü ashi. Item tayimtsü 11 rongnungi IndiGo indang ti aser GoAir indang asem lir, ta DGCA-i sangdong ka nung metetdaktsü. Iba ajanga A320neo tayimtsü nung PW1100 engine serial number 450 nungi tema aliba tayimtsütem India nung mejajar.
DGCA-isa sangdong ka nung, “IndiGo aser GoAir dang item engine ya tanaben meinoktsü shiogo” ta ashi.
Tentonü Ahmedabad nungi IndiGo A320neo VT-ITA tayimtsü abusoba sülen engine-i mapa meinyakba ajanga kasa tayimtsü anendak ajungben anentsüsa aküm, aser iba osang angashiba den külemi iba totuyuba ya agütsü.