Sukma nung Naxal temi CRPF 10 taküm samatsü

Sangtennü Chhattisgarh indang Sukma district kübok Kistaram tesem nung Maoists temi mita atar IED amshia CRPF dak amakba tesem nung mitkartemi bushisüngdangba mapang tangokba noksa nung angur.

Raipur, Metsüremi 13 (Agencies): Chhattisgarh kübok Sukma district nung Naxal temi CRPF tepsetba ter jungogo. Sukma nung aliba Kistaram tesem nung Naxal temi IED amshia sepai taküm samaba ya CRPF indang 212 battalion nungi lir. Kasa lendong nung CRPF trok yiru, aser parnok yirurtem rongnungi nisung pezü bo kanga mejungi yiru.
Sukma nung aliba Kistaram tesem nung Naxal telungpur 100 shi atsüka atar IED amshia amak, ta osang ajanga ashir.
“Sukma, Chhattisgarh nung tanü IED apokba ya kanga tejashitsüka lir. Linük tenzükba mapang taküm bendanga agütsüba sepaitem ajak nem ni akhum agütsür. Sukma lendong nung asür kibongtem den asükhu lemsateper. Yirur aliba sepaitem tekeraba nung taneptsü angutsü asoshi ni sarasademtsür. Sukma lendong atema ni DG CRPF den jembiogo aser Chhattisgarh-i aotsü shiogo,” ta Home Minister Rajnath Singh-i Twitter nung zülutsü.
“Sukma, Chhattisgarh nung lendong atalokba asoshi temulung shiranger. Asenok kümzüka ayutsü asoshi mapa inyakba mapang taküm samar CRFP tem nem India-i akhum agütsür. Asür kibongtem den asükhu lemsateper. Kiralongraba koktettsü asoshi asenok longjemer nokdaktsü,” ta Tir Ram Nath Kovind-ia Twitter nung zülutsü.
Congress Tir Rahul Gandhi-ia Twitter nung, sentong yangluba nung aibelenba ajanga linük telungzük nung tensa tamajungba akümba sayur, ta ashi.
“Tang mitabushiba maparen nung Naxal tem ya angu. Telok ka anti-landmine gari nung aoba mapang Naxal temi IED tem amshia poktoktsü. Osang tejangja ataba mapang lir. Iba gari nung nisung 11 liasü. Patrolling party ya Kistaram nungi Palodi-i anti-landmine gari nung aoba mapang Naxal temi IED amshia amak. Iba tesemi mitkar tali yokogo aser tangbo iba tesem nung injang akhaba mali,” ta CRPF nung Special DG, D M Awasthi-i osangbener dang ashi.
“Iba tesem nung forward post ka lir. Anogoshia amai iba tesem nung khateper. Tanepa Naxal züngsem ka khasetogo. Iba tatalokba ya kanga tia maka. Mitkartemi Naxal anema kanga sashia raradagi,” ta pai osangbener dang ashi.
Sukma nung 2009 nungi tenzüka CRPF aika taküm samadagi. Rongchii (April) 24, 2017 nunga Sukma district nung Maoists teloki mita atar amakba lendong nung Central Reserve Police Force (CRPF) nungi nisung 25 taküm sama aser 7 yiru. Iba lendong ya Naxal lenir PLGA Battalion 1 nungi Hidma-i anir agütsü. Iba lendong nung Naxal 10-12 tashi tepsetogo, ta CRPF ajanga ashi saka Maoists telok nungi tasümang kata mongutet. Sukma nung Bhejji yimtsü anasa aliba arem nung Metsüremi (March) 2012 nung CRPF nungi parnok 12 taküm sama. 2010 nunga Sukma kübok Tadmetla yimtsüng nung Naxal temi mita atar lendong agütsüba mapang CRPF 76 tepset.