Indian Wells asaya nung Federer, Wozniacki takok angu Serena tsükogo

Metsüremi 13 (Agencies): World no.1 nung alisang Switzerland nunger Roger Federer-i Serbia nunger Filip Krajinovic madak 6-2 6-1agi koktetta ATP (All Tennis Professional) Indian Wells Masters round pezübuba tongtetogo.
Iba asaya nung Federer-i ‘double fault’ ka dang asü aser aces trok tashi oteta liasü aser mezüngbuba serve point nung shilem 89 ngutet. Iba asaya piyong nung Federer-i ‘serve’ asüba nung point asem dang lalua liasü.
Defending champion Federer-i iba asayamung nung title trok buba angutsü atema meranga asayadar aser anogo asem tashi atonga centre stadium nung pai asayaogo.
2018 nung Federer-i ‘title’ ana tashi koktetta lir aser Aenjeti (January) Australia Open asayamung nung takok ngua pai ‘Grand Slam’ 20buba koktetogo.
Iba asayamung tebur asaya tanga ka nung France nunger Jeremy Chardy-i külem asayar Adrian Mannarino madak 7-5 4-6 6-1 agi takok nguogo aser round pezübuba nung Federer aser Jeremy Chardy na asayatsü jangjaogo.
Kasa asayamung tetsür asaya nung America tsür Serena Williams-i tennis asaya-i tanaben meyiba arua shilem agiba nung teyi Venüs Williams 6-3, 6-4 agi tamakok ngua tsükogo.
2017 Australian Open asayamung final asayaba sülen adianu ana ya tang mezüngbuba asayar liasü. Iba asaya Serena-i koka liasü. Iba sülen Serena mashisha akümba ajanga ita 15 tashi tennis asaya nung shilem magi aruogo.
Seed 10buba nung alila Venus-i round of 16 tongtetogo aser la Latvia tsür Anastasija Sevastova den asayatsü. Asaya tanga ka nung Sevastova-i seed 12buba nung alila Germany tsür Julia Georges madak 6-3, 6-3 agi koka lir.
Maneni, Australian Open nung takok angula Denmark tsür Caroline Wozniacki-i Belarus tsür Aliaksandra Sasnovich 6-4, 2-6, 6-3 agi kokogo.
Arishi küm 27 tain aser world no.2 nung alila Wozniacki-i round pezübuba tongtetogo aser iba round nung Wozniacki-i seed 20buba nung alila Russia tsür Daria Kasatkina den asayatsü.