British Scientist Stephen Hawking arishi küm 76 nung süogo

London, Metsüremi 14 (Agencies): British nunger nüngtugu physicist Stephen Hawking shiba temang nung timtem aliba aser genius asüba agi alima ajungai meteta lir, pa arishi küm 76 buba nung süogo, ta Rasemnü par kinunger sangdong ka ajanga metetdaktsü.
1988 küm züluba Hawking, indang kaket “A Brief History of Time” ya alima ajunga nung kaket ayokba rongnung tajungtiba ka aküm aser iba ajanga pa kanga nüngtugu aküm. Pa taküm aliba peyong Universe indang miim shisatsütem rajemtsü asoshi bendanga agüja inyakogo.
Pa British university city, Cambridge nung pa kidang Rasemnü anepdang süngjem süngjema süogo.
“Kübo asüba ajanga onok kanga mepelateter,” ta professor Hawking’er chir Lucy, Robert, aser Tim nungeri ashi.
“Pa kanga dang scientist tajung ka aser tangar dang nungi alakteta nisung balaka liasü. Pa mapa aser pai inyaktetba tem mesamai alitsü,” ta kasa sangdong ajanga metetdaktsü.
Arishi küm 22 asüdang 1964 pa motor neurone disease ka agi atongba sülen pa küm ishika dang alitsü ta takzüba tai kümtsüogo.
Iba tashidak ajanga pa marakzüteti aküm aser paralyze süa wheelchair nung dang liasü. Pai pa indang trademark ola synthesiser ajanga dang ashi o-a mejembetite aküm.
“Pa tasü aitba aser maneni mapa tajung inyakyonga aoba ajanga alima ajunga nung nüburtem ajungmesogo,” ta par kinungertemisa ashi.
Stephen William Hawking ya 1942 Aenjeti (January) 8 nü aso aser alima nung scientist tajungtem rongnung ka aküm. Pa Albert Einstein aser Sir Isaac Newton nunger jenjang nung züngshir.
1974 küm pa Britain nung nüngtugutiba scientific body, Royal Society nung arishi küm 32 asüdang züngsem aküm.
1979 küm pa Cambridge University nung Lucasian Professor of Mathematics shim, kong pa theoretical astronomy aser cosmology azüngtsüba atema Oxford University nungi arua liasü.
Taoba mapang nung iba nüngtugu mapa ya Newton-i bena liasü.