Venus aser Halep nati takok angu, Wozniacki tsükogo

Indian Wells, Metsüremi 14 (Agencies): Indian Wells asayamung tetsür kija tennis asaya quarter final tongtettsü asoshi America tsür Venus Williams-i Latvia tsür Anastasija Sevastova madak 7-6 , 6-4 agi takok ngutetogo.
Arishi küm 37 tain America tsür, Venus-i Sangtennü (Tuesday) tenu tanutsüla, Serena madak straight-set agi takok ngua liasü.
Venus-i taküm mezüngbuba asayamung ana nung tamakok anguba sülen, Indian Wells asayamung nung lai set ka nung danga tamakok ngua mali.
Iba asayamung quarterfinal nung Venus-i seed 27buba nung alila Spain tsür, Carla Suarez Navarro den asayatsü. Carla Suarez-i America tsür wild card ajanga asayar, Danielle Collins madak 6-2, 6-4 agi kokteta lir.
Iba asayamung round pezübuba asaya ka nung Romania tsür Simona Halep-i maneni World No.1 jenjang nung alitsüsa, China tsür Wang Qiang madak 7-5, 6-1 agi takok ngutetogo.
World No. 20 nung alila Russia tsür Daria Kasatkina-i World No. 2 nung alila, Denmark tsür Caroline Wozniacki madak 6-4, 7-5 agi takok anguba sülenbo taoba mapang Indian Wells takok angur rongnungi Halep kija anünga lir. Maneni tetsür asaya tanga ka nung Croatia tsür Petra Martic-i Czech Republic tsür Marketa Vondrousova madak 6-3, 7-6 (4) agi kokteogo. Quarter final nung Halep aser Petra Martic na asayatsü.
Kasa asayamung nung America tsür Amanda Anisimova-i takok ngua aruba tembangja seed pungobuba nung alila Czech Republic tsür, Karolina Pliskova-i 6-1, 7-6 (2) agi tsükdaktsü.
Arishi küm 16 tain, Anisimova-i WTA Indian Wells asayamung nung mezüng asaya asem tashi nung takok ngua lir. Iba asayamung nung Anisimova-i Pauline Parmentier, seed 23buba nung alila Anastasia Pavlyuchenkova aser Wimbledon nung anaben takok angur Petra Kvitova madak set ka nung danga tamakok mengui takok nguteta liasü.
Pliskova-i aser Japan tsür Naomi Osaka na tsüngda quarter final asaytsü. Osaka-i Greek tsür Maria Sakkari madak 6-1, 5-7, 6-1 agi takok ngua liasü.
Maneni, kasa Indian Wells tebur kija tennis tasembuba round asaya nung India nunger Yuki Bhambri madak America nunger World No. 21 nung alisang Sam Query-i 7-6(4) 4-6 4-6 agi tsükdaktsü.
Kanga dang anibelema asayaba mapang arishi küm 25 tain, Bhambri-i breakpoint 15 nungi 11 kümzüka liasü.
Bhambri atema iba asayamung nung shilem agiba ya kanga tulu liasü. Iba asayamung nung Bhambri-i Grand Slam tarep asaya anaben takok angur, Nicolas Mahut tsükdaktsü aser World No. 12 nung alisang, Lucas Pouille madak takok ngua tasembuba round tongteta liasü.
Iba asayamung nung France nunger Pouille aser Querry na den asayaba ya khenyongi balaka liasü, ta Bhambri-i ashi.
Maneni kasa asayamung tebur kija asaya ka nungsa Argentina nunger Juan Martin Del Potro-i Spain nunger David Ferrer madak takok ngua round pezübuba tongtetogo.
Sangtennü (Tuesday) ‘hard court’ ka nung asayadang, World No. 8 nung alisang, Del Potro-i Spain nunger Ferrer madak 6-4, 7-6 (7/3) agi takok angu.
Iba asayamung quarter final nung Del Porto-i Argentina nunger Leonardo Mayer den asayatsü. Leonardo-i asaya ka nung Japan nunger Taro Daniel madak 6-4, 6-1 agi takok ngutetta lir.
“Indian Wells asayamung nung ‘title’ ngutettsüba ya kü pungmang lir. Taoba mapang iba asayamung nung ni final aser semi-final tashi tongtetta asaya liasü saka ni kodanga takok mongudang,” ta Del Porto-i ashi.
Indian Wells asaya ka nungsa Germany nunger Philipp Kohlschreiber-i World No.3 nung alisang, Marin Cilic madak 6-4, 6-4 agi akok.
Kohlschreiber-i round pezübuba nung France nunger Pierre-Hugues Herbert den asayatsü. Herbert-i asaya ka nung külem France nunger Gael Monfils madak takok ngua liasü.
Maneni iba asayamung tasembuba round asaya nungsa Canada nunger No. 1, Milos Raonic-i Portugal nunger Joao Sousa madak 7-5, 4-6, 6-2 agi takok nguogo.