Tashiyim amshia raksatsüba anema tanü Kohima nung rally akatsü

Kohima, August 31 (TYO): August 22 nü Kohima yimtsüng nung lanur kati tantsür ka tashiyim amshia raksatsüba anema asüng (Mongolbar) Kohima Village Council (KVC) aser Kohima Village Youth Organisation (KVYO) nati ayonga rally ka akatsü.
Iba lokti senden nung adentsüpur anepdang 9:30 ako nung Government High School junction nung adenshitsü aser Chief Minister meyong official kidangi oa memorandum ka agütsüba sülen Kohima Local Ground nung lokti senden akatsü.
Iba dak sentakba nung KVYO Tir, Ketounei Kire-i, iba rally akaba mapang Kohima village jurisdiction (Kohima main town aser wards/colony maden) nung shishilembaba dokan ajak shibangtsü, aser rally matem tashi Kohima village telungtem nung gari senzütsü memelatsü, ta ashi.
Ajisüaka iba nungya Kohima jila aser ward tembo maden, ta paisa ashi.
August 22 nikongdang 4:00 ako meta lanur kati Kohima Village nungi arishi küm 60 tantsür ka tashiyim amshia raksatsü.
Tang tai tonglokja alisang, Thanwalo Magh ji police ket nung lir. Pa ya Tseminyu sub-division kübok Tesophenyu village nungi lir. Pa dak alia ano temulung melemteti alir nisung pezü police ket nung lir.
Tantsülaji tang Kohima nung aliba hospital ka nung ICU nung yaridagi.
Ano tanga osang ka nung Superintendent of Police, Kohima, Joseph Hesso-i nüburtem dang, kodamasüba nüngdak madokra anepdang 9:30 ako nungi iba sentong matem tashi Kohima jila tiyong nung gari mesenzütsü atema mepishiogo.
“Iba tetuyuba ya procession junga agitettsü aser nüburtem dak mepetmesü kecha mataloktsü asoshi agütsür,” ta police ketdangserisa ashi.