Lokteperbo Kokdisü ?

-Tangsen Lemtur

Alima nung tsüngküm mongpu aser putu yimya melenshiba ama alima yimden  yimsüsüba menden melenshir. Yimtsüng sasep nunga putu menden melenshia kar khen, kar khen ta merener. Nagaland nunga mapang ka nungbo Congress Party kanga merenogo, yamaji NPF-a merenogo, aser nüburtemi temelenshi aginüa tang teloktep sorkar tasen ka shimogo. Iba denji kasa India linük nunga yimtenren party tulutiba ana- Congress aser BJP na melentepa merendar. Tang anogoshia amato BJP merenba mapang aser Congress sentsü kanga ajema akümba mapang ka asütsü. British nunger yimsüsüba kübok India nunger küm aika lir nüchiso anguba sülen Congress-i küm aika linük yimsü süa aruogo, aser tang BJP-i aniba sorkari yimsü tesüdak lir. Yimtenren nung takotet lenirtemi par telok tashi itdaktsüba dang masü saka tanga yimtenren party tem jenjanga raksatsüyonga aoer. Yaküm Kerala nung election nüboyimba sentong ka nung jembidang BJP Tir, Amit Shah-i, “Ozü party tongtibangtiba onükji ‘India nung Congress Party meshimeshi samatsütsü’ lir” ta odiodia jembia liasü; yamaji parnoki Congress jenjang kanga mejungi kümdaktsüogo. Aji oda tang mezüng Mizoram state dak alaka Northeast nung tanüngba state ajak nung BJP densema sorkar kümogo. Tawa Tripura, Meghalaya aser Nagaland nung BJP densema sorkar akumba sülenbo tang India nung Congress-i yimsüsüba state/UT pezü (Karnataka, Mizoram, Pudducherry & Punjab) dang kümogo. Northeast nung BJP tera junga yangogo aser tang parnoki south India nung aliba state tem nung rangloker inyaker. 2014 küm Lok Sabha election atema nüboyimba mapang nung BJP-i nangzükba tongti onükji “Tajung Anogotem” liasü iba dak alia Ato kilonser candidate, Narendra Modi-i BJP sorkar arura bendang linük balala nungi black money meyipa bener arua senso shia bank account nung sen lakh 15 inoktsütsü, aser linük nung mapa million 10 adokdaktsütsü ta nangzüka liasü, aser item tenangzükba nung ajemdaker parnoki takok tulu angu. Ajioda joko Centre sorkar kümsük küm ka dang anünga lir, anungji tang mapang ya nüburtemi BJP-i nangzükbatem asadangba mapang ka lir. Yimtenren party ajaki nüburtem dang jenti nangzüker, ajisüaka itemji mapa küma inyaker asü masü, ibaji tongtibang. 2014 General election nung nüburtemi Narendra Modi dak tamang ka pai aniba party nem takok tulu ngudaktsüogo, aji oda par sorkari küm pongu yimsüsüdang junga inyakra nüburtemi parnoksa shimtsü. Tang India nunger yimtenren tensa nung ajemdaker Congress lenir aser UPA Chairman, Sonia Gandhi-i, lokteperbo kokdisü? ta bilema taruba küm Lok Sabha election nung BJP anema party tem lokteper tokteptsü atema tawa opposition party 20 nungi lenirtem jaoka senden menogo. Nagaland nung NDPP-BJP-i lokteperbo NPF madak takok nguogo, yamaji Congress-i opposition party aika lokteperbo BJP kokdisü ta bilemer, ajisüaka ibaji mapangi dang sempettsü.