World Consumer Rights Day mungogo

Dimapur, Metsüremi 15 (TYO): ‘Making digital market places fairer’ omen nung ajemdaker New Market Area Panchayat Hall nung Metsüremi (March) 15, 2018 nü World Consumer Rights Day mungogo.
Iba sentong ya New Market area Panchayat aser New Market Youth Ogranisation ajanga ayongzük aser Legal Metrology & Consumer Protection Department, Kohima ajanga sponsor asü. Taküm iba omen ya alima nung nisung ajaki amshitetba, tekümzükba aser tajungba digital market tesemtem ajungkettsü nükjidong nung agi.
Iba sentong nung jembiba mapang, consumer ka ama nisung ajaki asen temeden meteta alitsüla aser lijaliyongba mapang quantity, quality aser expiry date metettsüla, ta NVCO tir, Kezhokhoto Savi-i ashi.
Digital market indang tajangzük amshiba/agiba mapang iba sabang nung taila aser ochimashi mapa inyakba meteta alitsü tim. Shishilembaba nung consumer ya chuba lir aser consumer medeni shishilembaba malitsü, ta pai ashi.
Pai-sa Legal Metrology & Consumer Protection Department dang mapa tali inyaka consumer rights indang awareness tajungba nung agütsütsü mepeshi. Iba sentong nung pai-sa GST aser Consumer Rights Act tem indanga shisem.
Iba sentong ya NMYO tir, Vikholie Yiese-i ketdangsüa agi. Legal Metrology & Consumer Protection nungi Jt Controller, Haikam Zekiang-ia iba sentong nung jembiba mapang par department inyakyim indang rasaa ashi aser Consumer Rights Day nung shilem agiba ajanga ajangzükba indang shisem.
Iba sentong nung NMAP Chairman, Kuotsuwjelie Kehie-i tepela o jembi aser Flames of fire Church, New Market nung pastor, Roukuolhoulie Solo-i sentong tenzüka sarasadem. Maneni iba sentong nung Justin & Sam nati temeja ken aten aser school tanurtemia shilem tajung agia liasü.