Korea nungeri yimjung atema inyakba tushir

Seoul, Metsüremi 15 (Agencies) : North Korea den yimjung yanglutsü atema meranga inyakba atema China Tir, Xi Jinping-i South Korea dang pelaba metetdaktsüogo aser Russia nungeria parnok nungittsü shiogo, ta tanü Yangtepnü iba maparen inyakba South Korea nunger ketdangsertemi osang ka metetdaktsü.

Taoba hopta tsüngda National Security Office tekolakba, Chung Eui-yong-i Beijing aser Moscow yimtiten nung ketdangsertem dang parnoki inyakba maparen lemsatepa liasü.

North Korea, South Korea aser US lenirtem tsüngda temaba jenjang nung senden amentsü atema pai anir anepalua inyakba nung takok anguba sülen Chung-i ibaji lemsatepa liasü.

Incheon International Airport tonga arur külen osangbenertem den jembidang Chung-i ashiba agi, Xi Jinping-i China nunger shin o ka nungi yamai lemsatepa liasü, “Rüjep temerang yimsaa aoba sülen Metsürem mongpu arur aser naro apongtsü tenzüker; iba denji liromedema Korea nunger tzümeketli nung tensa kümdagi aser tang tensa tajungba akümba ngua nia nungiter.”