Menuosetuo Yiese 26buba Naga wrestling champion kümogo

Kohima, Metsüremi 15 (TYO): Nagaland Wrestling Association (NWA) puri ayongzükba 26buba Naga Style Wrestling asayamung, Angami Sports Association (ASA) nungi asayar Menuosetuo Yiese-i kokogo.
Arishi küm 19 asayar ya tar süklep 6 lir aser temang tozük seret 118 lir. Menuosetuo ya Kohima yimtsüng nungi asür Khrilatuo Yiese’er jabaso lir.
Asayamung final asaya nung Meneuosetuo-i arishi küm 22 tain Phek yimtsüng nungi Hukhoneyi Soho’er jabaso Vekutho Soho koka liasü.
Jotsoma yimtsüng nungi ASA tenüng nung asayar Mhasilhousie Nagi-i tasembuba jenjang ngutet aser Thenyizu yimtsüng nungi CWA tenüng nung asayar Venuzo Dawhuo-i pezübuba jenjang koktetogo.
Championship akokba atema Menuosetuo nem senpet sen lakh 3.3 den asür Velahü Memorial Trophy aser sen 30,000 agütsü. Runners-up Vekutho nem senpet sen lakh 2 agütsü aser tasembuba o pezübuba nung takok angurtem nem sen lakh 1 aser 80,000 ta agütsü, Quarter final nung tamakok angur shia nem sen 20,000 agütsü.
Anepdang asaya tenzükba sentong nung Minister for Planning and Coordination and Land Revenue, Neiba Kronu tetushi tesemdanger asü.
Sentepa aliba lokti den o jembiba mapang nung pai Naga wrestling ajungkettsüba atema NWA-i meranga inyakba atema parnok tenüng asangba den Naga wrestling ya Tenyimi districts asem nung dang masü saka National aser international jenjang nung ajungkettsü asoshi ajungshi, kechiyong South East Asian linük tem nunga Naga style wrestling asaya yimya mesüka asayar, ta ashi.
Asayartem ya ajaki akhüm tsübur ta shia pai parnok dang bendanga agüja asayatsü aser professional akümtsüba atema meranga teti practice asütsü asoshi ajungshi.
Kasa mapang nung nisung 25,000 dak tema sentepa aliba maongka agia Kronu-i Chief Minister Neiphiu Rio tenüng nung state nung aliba nüburtem den tepela salem lemsatep. Iba sentong nung Chief Minister Neiphiu Rio-i shilem agitsüba liasü.
Paisa nüburtem dang Rio lenisüba kübok NDPP-i aniba PDA sorkar den teka ametper inyaktsü asoshi mepeshi. Paisa ashiba agi, sorkari terenlok atema project balala inyaktsüba aser lenmang mejungi aliba tangsa yanglutsü asoshi telemtetba agiogo.
“Sorkari temelenshi bener arutsüba atema telemtetba agiogo.. State nung terenlok mapatem kecha tetsükdangtsü makai inyakyonga aotsüba atema nüburtem teyari nüngdaker,” ta Kronu-i ashi.