Taoba sorkari gari lenmang atema meranga inyakogo: NPF

Kohima, Metsüremi (March) 15 (TYO): Nagaland nung gari lenmang majungba ya NPF-i aniba taoba DAN sorkar aser taoba Chief Ministers- TR Zeliang aser Dr Shurhozelie Liezietsu atema kanga tongtibang onük ka liasü, aser iba atema Central sorkar den inyaka aruogo, ta tanü Press Bureau, Naga People’s Front, Central Headquarters sangdong ajanga metetdaktsü.
Parnoki kanga meranga inyaka aruba atema telangzüba tajung ngua Ministry of Road Transport & Highways-i state nung sen crore 3000 jenjang gari lenmang project 12 agizükogo; Naga People’s Front-i akhangba ama ataloktsüba atema India sorkar dang kanga pelar, ta sangdong nungsa shia lir.
“Rio-i aniba PDA sorkari tenangzükba agiba anogo nung, anogo 60 tsüngda district headquarters ajak nung gari lenmang yanglushitsü ta sangdongbaji pelaa agizüker, yamaji ajaki pelaa agizüker. Ajisüaka sangdongbaji balaka, aser sangdongba ama inyakbaji balaka, kechiyong state sorkar ket nung senotsü mali. Rio-i sayatenya ka ajanga senotsü poktetdaktsütsü asü? mesüra pai inyakyim kecha mebenshii contractor tem nem mapa inyakdaktsütsü?, sapet-rapeta mapa inyakdaktsür sülen tarutsü nung senotsü tali aruba nungi agutsütsü asü, kechiyong taoba mapangtem nunga pai yamajisa inyaka aruogo. Yamaji inyakra tarutsü anogotem nung state senotsü jenjang tamajungba akumtsü. Atangji temelenshi arudar,” ta sangdong nungsa shia lir.
“Nüburtem takoksa ngudakja PDA sorkar pusemer contractor tem tajangzük ngudaktsütsü atema tatemtsü meyanglui parnoki, taoba sorkari India sorkar matsüngdang benoka aliba gari lenmang project balala atema inyaktsüla,” ta NPF-isa metetdaktsü.
“Rio Delhi-i aoba sülen pai yimtenren anokshitsüaka Dr Shurhozelie aser TR Zeliang-i aniba taoba sorkartemi Nagaland nung alirtem nüma tangtettsüsa parnok nem gari lenmang tajungtiba agutsütsü atema mangdang yur inyakogo,” ta sangdong nung shia lir.
PDA sorkari Niuland (Dimapur)- Guzunyu Junction (Tseminyu)- Pughoboto- Satakha- Aghunato- Shamatore- Noklak- Pangsha highway; Dimapur- Kohima Capital Road (Byepass) Highway; Trans Eastern Highway, Longwa- Pangsha- Mimi aser Avangkhu sendaktepa yanglutsüla, iba denji tanga lenmangtema tetsükdaktsü kecha makai tangsa tang yanglu tenzüktsüla aser mapang telatet ka nung mapaji tembanga inyaktsüla, ta Press Bureau, Naga People’s Front, Central Headquarters sangdong ajangasa metetdaktsü.