Nagaland CM, Rio-i PM Modi den Central lenirtem ajurutsü

New Delhi, Metsüremi (March) 15 (Agencies): Nagaland Chief Minister, Neiphiu Rio, Rasemnü (Bodhbar) nikongdang linük yimtiba, New Delhi tonga ogo aser pai Ato kilonser, Narendra Modi densema Union Minister tem aser Central lenirtem aika ajurutsü sentong lir.
Osang angazükba agi, NDPP-BJP teloktep sorkar nung lenir, Rio-i Ato kilonser, Narendra Modi-a ajurua senden amentsü.
Iba mapang nung lenir anati state nung gari lenmang densema infrastructure aser terenlok balala atema jembitsü aser Naga yimtenren ken oa jembitsü imlar.
Tan ita tetenzüklen Rio-i Chief Minister menden atema tenangzükba agiba sülenbo tang mezüng pai New Delhi semdanger.
2003 küm nungi 2014 küm Monupii (May) ita tashi Rio state Chief Minister inyaka liasü, iba sülen pa Lok Sabha MP küma Delhi nung ali.
Nagaland Assembly election atongtsü lia pai NPF toktsür tawa tasen tentetba party- NDPP nung adenba den külemi pai Lok Sabha menden toktsü.
Pai tang Delhi semdangba mapang nung Union Home Minister, Rajnath Singh aser Finance Minister, Arun Jaitley na densema Union Minister aika ajurutsü.
Paisa National Security Advisor, Ajit Doval-a ajurutsü, ta osang angazüker.
Osang angazükba agi, Northeast nung Special Accelerated Road Development Programme kübok Nagaland nung gari lenmang 12 yanglutsü atema Union Ministry of Road Transport & Highways-i agizükogo.