Lok Sabha nung BJP züngsem 110 tashi ajema akumtsü: Shiv Sena

Mumbai, Metsüremi 16 (Agencies): BJP-i Gorakhpur Lok Sabha by election nung tamakok angubaji asüküm tamakok ngudaktsüba lir, ta shia tanü Shiv Sena-i, 2019 küm Lok Sabha election mapang tashi nungbo Lok Sabha nung BJP züngsem 110 tashi ajema kümer alitsü, ta ashi.
Centre aser state naprongla nung Shiv Sena ya BJP teloktep nung densema lir, ajisüaka parnoki mapangshia BJP aija arudar.
Shiv Sena-i, pei medemer toktsürtem aser tiyazü lenmang nung jajartemi tamakok angutsü, ta ashi.
“BJP-i Tripura ama state tila ka nung takok angu. Party-i iba atemaji benjungtepba mapang ka nung Uttar Pradesh nung Lok Sabha by election menden ana nung parnoki tamakok nguogo,” ta Sena indang osangkaket ‘Samaana’ yimobilem zülu nung shia lir.
“Item election osang ajanga BJP aoksa tenzükogo. Party (BJP) junga amenoka aliba tesem ana- Gorakhpur aser Phulpur menden nung SP-i takok angu,” ta Shiv Sena-isa ashi.
Centre nung Modi sorkar tentetba sülen Lok Sabha menden 10 atema by election agiogo aser menden 10 nungjagi BJP-i menden 9 tashi nung tamakok nguogo.
Uddhav Thackeray-i aniba party Shiv Sena-i, “Tamasabo Lok Sabha nung BJP MP 282 liasü saka tangbo 272 dang kümogo. Modi aser Amit Shah na leniba kübok by election ajak nung BJP-i tamakok ngua arudar,” ta ashi.
“Yaküm Uttar Pradesh Assembly election nung BJP-i otsü tasen yanglua menden 325 nung takok angu. Yogi Adityanath chief minister akum aser Keshav Maurya deputy CM akum. 1991 küm nungi Adityanath-i Gorakhpur menden nung tamakok mengudang. Saka tangbo CM süaka par party-i tamakok angu. BJP-i Tripura nung Left sokar atsüngdoktetra kechiba parnoki Gorakhpur nungbo takok mangu?” ta Sena-i asüngdang.
“2019 küm nungbo BJP-i menden 280 mengutettsü. Züngdangbaji 100-110 tashi ajema akumtsü. Pei medemer toktsürtem aser tiyazü lenmang nung jajartem atema tamakokji angu langlang,” ta Sena-isa shisem.