Florida nung tetsüng apu jirepa 6 asü

Florida International University, Miami nung tetsüng agi senzür atema yangluba apu tasen ka highway nung chirepba nung ketdangsertemi teyari balala agütsüba mapang noksa nung angur. Iba lendong nung nisung aika asü aser gari aika raksa.

Miami,Metsüremi 16 (Agencies) : Florida International University anasa gari lenmang temadak tetsüng agi jajatsü atema tawa tasen yangluba apu ka jirepa nisung 6 süogo, ta osangbenertem den jembidang Florida nungi US Senator, Bill Nelson-i metetdaktsü.
Ton 950 taret apu jizüka aluba mapang gari ti anenbanga liasü aser nisung ti arsanga mozü kidangi anir ao, ta ketdangsertemi osangbenertem den jembidang ashi.
South Florida nungbo gari teimtiba senzüba lenmang rongnung ta züngshidakji yindong perepsar ano gari anensar alidak rongdak teyaritepertemi azü anir arua nisung kar danga madokteti lishia ta bilema bushia liasü.
Lendong atalokli helicopter amshia television osang yokertem dang tesem toktsür aotsü mepishia ashi; yirur alir kari danga parnok kümzükang ta ayimdenra iba olaji teyaritepertem nem angashidaktsütsü mechi parnoki ibaji mepishi, ta Miami TV station ajanga metetdaktsü.
Khen nung gari ti jajatsü akokba gari lenmang tuluka temdanga iba apuji taoba Küptoknüto ghonda trok tsüngda Florida International university o Sweetwater jila na sendaktepa yangluba liasü.
FIGG Engineering-i ashiba agi, iba apu yangluba nung paronki shilem agia liasü aser bushisüngdangertem den bendanga agütsür amalitepa aotsü; küm 40 inyaka aruba nung tan ya mezüngbuba iba lendong ajurur, ta parnokisa shisem.