PHED online tzü bill system tenzük

Kohima, Metsüremi (March) 16 (TYO): Tanü Chief Secretary’s Conference Hall nung Chief Secretary, Pankaj Kumar, IAS-i PHED online ajanga water bill payment system tenzüktsüogo.
Iba sentong nung jembidang Secretary, PHE Department, Moangwati Aier, IAS-i, Nagaland state atema smart city plan dak sendakba nung department-i tang mezüng sensotem atema online water bill payment system lapoktsür, ta metetdaktsü.
Mezüngbuba online billing system Kohima nung commercial establishments atema tenzükja liasü, aser database, software aser hardware download asüba sülen tanüngba districts ajak nung tenzüktsü, ta paisa metetdaktsü.
Online payment system ji mezüngbuba shilem nung commercial establishments atema tenzüktsü aser hopta ka sülen domestic consumers atema lapoktsütsü, ta pai metetdaktsü.
Kumar-isa, iba facility ya state yimtiba nung domestic consumers aser tanga districts nung consumertem nema agutsütettsü imlar, ta metetdaktsü.
Online payment system ajanga tzü bill agutsübaren nung consumer temi kanga anisüngzük angutsü, ta shia pai, 2017-17 küm nung department-i sen crore 2.5 saruteta liasü aser 2018-19 küm atema alizüngji crore 2.6 asutsü, ta ashi.
Online payment system tenzükja Chief Secretary, Pankaj Kumar, IAS-i department-i state yimtiba nung nüburtem atema online payment system tenzüktsüba atema tenüngsang agutsü.
State kübok jila 8 nung online electric bill payment facility agutsüba ajanga sensotem kanga teyari nguogo, ta pai ashi.
Anungji tzü bill-a online payment ajanga agutsütsüji kanga nüngdaka liasü, aser PHE den IT Department nungi technical teyari agutsüba ajanga tanü ibaji tenzüktsür, ta paisa shisem.
Kumar-isa iba mapa takok angutsüsa kanga meranger inyaker AHoDs, HoDs aser Engineers tem nem tenüngsang agutsü.
Consumers-i credit card ajanga aser web site www.phedonline.nagaland.gov.in nung net banking ajanga bills ji online agutsütettsü.