Khrietho Peli No. 11 P Khel-i Jubilee aser Sekrenyi among

Metsüremi (March) 16, 2018 nü Kohima village nung Peli (Peer group) No. 11, P Khel züngsemtemi Jubilee den Sekrenyi benjung repsema amongba mapang tangokba noksa nung angur.

Kohima, Metsüremi (March) 16 (TYO): Kohima village kübok Pfuchatsumia Khel nung lokti tentet Khrietho Peli No. 11-i tanü Golden Jubilee aser Sekrenyi festival benjungmong na külemi reptepa mongogo, ta osang ka ajanga metetdaktsü.
Iba benjungmong nung sobaliba sentong lapoktsüdang tongti tesemdanger, P Khel nung Head GB/Kohima District GB Association Tir aser Finance Secretary, Nagaland GB Federation, Vineipra Pienyü-i, Jubilee ya benjungmong mapang ka, pelatepba mapang ka aser tesüiba mapangtem asadanga tarutsü atema sentong yangluba mapang ka lir, ta ashi.
Paisa sobaliba wazüka ayuba den külemi sobaliba ajungkettsütsü atema ayongzük.
Sekrenyi benjung ya pei asüngtetba mapang ka lir, ta shia pai Peli No. 11 nüburtemi longjemer iba sentong ayongzüka amongba atema pelaba metedaktsü.
Khrietho Peli No. 11 ya 1987 küm züngsem 103-i tenteta liasü, aser tang züngsem 86- tetsür 50 aser tebur 36 lir.
Khrietho Peli No. 11 tentetba mapang nungi teloki sobaliba ken aser yar tsüngsang ajanga sabang balala nung sobaliba ajungketja arur.
Osangbenertem den jembidang Organizing Committee Convenor, Khrietho Peli No. 11 golden jubilee 2018, Keneingu Rutsa-i, “Kiahe Rütso” mapang nung züngsemtem sobaliba sobotsü semer ka kuma longjemer aser anogo piyong sobaliba ken tena yar tsüngsanga benjungteper, ta metetdaktsü.
Paisa, “Kiahe Rütso” ya mapang talangka nungi benshia arur aser tetsü teboutemi küm piyong alu wadang nung nokdakba sülen “Kiahe Rütso” ajanga shisalemsateptsü atema sabang agutsür, ta ashi.
Paisa, Sekrenyi benjung ya nija temang aser shisatsü naprongla meshitetba mapang ka lir, ta ashi.
Paisa, Sekrenyi benjung ya nisung ana tsüngda tsükchitepa aliba apu laa medemer tajung akumtsü mapang ka lir, ta metetdaktsü.
“Kiahe Rütso” mapang medemertem, taintem aser temeimertem jaoka benjungteper, ta paisa shisem.
Iba benjung nung chiyungtsü balala den mejemtzü renema benjungteper, ta Rutsa-i ashi.
Parnoki Jubilee nüngshilongji Peli Badze, Gaziephe, P. Khel, Kohima Village nung semzüktsü aser iba sentong nung tongti tesemdangerji Angami Public Organization senyur aser Advisor Northern Angami Public Organization, Vilieo-o Rutsa asutsü.