Les Miserables nung Valjean ama shilem agisang süogo

New York, September 01, 2015: New York nung Les Miserables show nung tanak nisung rongnung tanubusang aser mezüng Jean Valjean ama shilem agisang, actor Kyle Jean-Baptiste arishi küm 21 nung süogo, ta media ajanga metetdaktsü.

Pa Broadway den July tatemlen nungi shilem agia liasü. Iba otsü ya joko küm aika kanga nüngtugusa arur.

“Les Miserables show nung shilem agirtem aser teinyakertem ajak pa asüba osang angashia kanga aoksatepa liasü. Pa ya mamangtettsüka kanga kara aser ajungbena iba lima nungi piladoker. Pa ama sempet tajung aketer ka yamai meyimlaba mapang süadokba ya ajak asoshi kanga dang takoksa tulu lir,” ta Les Miserables atema inyaker sangdong ka ajanga metetdaktsü.

Police-i, Kyle ya asaa kari tepsetbabo memesük. Pa ya ki atongtepa atuba pezübuba nungi ajupeter merepzüka tsükba lir, ta ashiba New York Times ajanga metetdaktsü.

Kyle ya medemer ka den ajungbena mi lendong atalokba mapang ajentsü asoshi jenjang yanglua aliba nung mena kazür nokdakdang ajupeter merepzüka tsük, ta New York Times ajanga ashi. Les Miserables show tatembangba nung shilem agiba sülen pa iba lima nungi pila.

“Broadway den iba sentong nung ni shilem agiba ajanga kü taküm nung temelenshi aika ajuruogo,” ta tang hopta pai tatembang buba Valjean ama shilem agitsü mapang twitter ajanga lemsatepa liasü.

Iba ya dang masü saka pai tanga show-a aika nung shilem agia lir aser mapang tatsü ka anisüngzüka lir külen ano Broadway densa ‘The Color Purple’ nung shilem agitsü sentong liasü, ta local CBS station ajanga metetdaktsü.