UCL Draw nung Liverpool-i Manchester City ajurur

Metsüremi 16, 2018 (Agencies): Taküm UEFA Champions Leagur quarter-final draw ya taoba küm final tanaben asayashiba den sako lir, kong Juventus-i Real Madrid ajurur aser English Premier League nung Manchester City aser Liverpool na asayatsü.
FC Barcelona-i AS Roma den asayatsü aser Round of 16 nung Manchester United tsükdaktsür, Sevilla-i Bayern Munich den asayatsü.
Barcelona captain, Andres Iniesta-i Champions League takok marok bena aliba telok, Real Madrid majuruba tajungba asütsü ta Rogonü quarter-final draw masaya tsüngta shia liasü.
“Ni Spanish team maginer, kechiyong onok kanga junga metettepa lir,” ta Iniesta-i ashi, kong iba stage nung kasa linük nungi tanga club tem ajuruba nung kümzüka mali.
“Champions League akoktsü bilemba ajanga teti ajungshir, saka ibai tasak lir. Tetoktepba nung aibelen masütsüla, kechiaser khen junga masayatetra na out asütsü,” ta pai ashi.
Italy nungi taoba season asem nung Champions League runner-up anaben tashi nguteta aliba telok, Juventus coach, Massimiliano Allegri-ia Barcelona aser Lionel Messi majurunüi liasü. Rasemnü Lionel Messi-i pa asoshi Champions League nung goal 100buba agütsüteta lir.
2015 Champions League final nung Juventus ya Barcelona-i tsükdakja liasü. Tang season group stage asaya Camp Nou nung asayaba mapang Allegri’er telok ya Barca-i 3-0 agi akok aser Turin nung asayaba mapang telok katia goal kata magütsütet.
“Ni Barcelona majuruner, küm aika parnok ajurua arur küm ka bo anisüngzük nüngdaker,” ta taoba küm quarter-finals nung Catalans madak 3-0 aggregate nung akoktsüsa tasa yanglusang, Allegri-i ashi.
Saka taoba mapang AC Milan coach inyaksang ya Real Madrid ajurutsü atema khuret abener. Zinedine Zidane kübok Real Madrid ya knockout round tem asaya kata nunga tamakok ajurua mali aser taoba küm Aami (June) nung Zidane’er teloki Allegri telok madak 4-1 agi koka Champions trophy 12ben buba aben.
Sevilla nung aliba mapang nungi nüngtugu akümsang aser tang Roma sporting director, Monchi-i Pep Guardiola indang Manchester City ya Europe nung football asayaba telok rongnung tashi taittiba ta amanger.
“Shirnok tajungtibar ashitsü tasak. Barcelona akoktsü ya tasak, kechiaser parnok telok nungi Messi ya tangar asayar ama masü,” ta Monchi-i ashi.
“Anu Real Madrid ya yamaji dang, kong iba club yagi ajak akoker; Juventus ya takok ngua asayaba mapang lir; Manchester City ya aikadang nungi tajungtiba; Bayern Munich-i Besikats nung telok tajung ka ajuru aser parnoki 5-0 agi akok,” ta Monchi-isa shisem.
Saka Bayern Munich coach, Jupp Heynckes-ibo par teloki team mashi den asayatsü renema lir ta ashi.
“Asayar tajung ajak alitsü ya tongtibang. Aser mapang shidak nung tia ajungtsüla,” ta Heynckes-i ashi.
UCL quarter-finals indang mezüng leg ya Rongchii (April) 3-4 nung asayatsü aser tanabuba leg ya Rongchii 10-11 nung asayatsü.
UCL Draw
FC Barcelona vs AS Roma
Sevilla vs Bayern Munich
Juventus vs Real Madrid
Manchester City vs Sevilla