Meghalaya Governor-i assembly nung Hindi jembiba anema noktaker

Shillong, March 16 (Agencies): Rogonü (Hokolbar) Meghalaya Legislative Assembly nung tang mezüngbuba atema Governor-i Hindi oshi agi jembi.
Budget Session mezüng anogo nung Governor, Ganga Prasad-i Hindi oshi agi jembiba atema tejashi sayua opposition züngsem Ampareen Lyngdoh (Congress)-i assembly nung medeni kimai alu.
Taoba Meghalaya urban affairs minister Ampareen-i kümsük asemben atongtepa East Shillong menden nungi takok angu aser lai ashiba agi, Governor-i Hindi oshi jembiba ajanga Meghalaya nung alirtem temulung yirutsüogo.
“Democracy ajanga kati ka akhümtsüteptsü ajungshir. Ajisüaka, Governor-i Hindi agi jembiba atema ni jashi. Talisa pai Garo Hills dang ‘Gora Hills’ ta aja saka Meghalaya nungbo iba tesemji mali” ta Ampareen-i ashi.
Centre-i Meghalaya nung Linük Ka, Oshi Ka’ tangatetba benoktsü merangba anema noktaktsü, ta opposition lennirisa shisem.
“Hindi agi jembibaji Governor-i onok ajemshiba lir. Temeteter ka ama, pai onoki aginüba oshi agi jembitsüba asü. Pai official language dang nungi tanga ka jembinüra, speaker nem osang sangoktsütsüla aser inyakyim sülen anidaktsüba asü” ta laisa ashi.
Governor Prasad ya Meghalaya nung governor 17 buba lir aser pa Rongjui (September) 30, 2017 nü tenangzükba agia liasü.
Pa ya Bihar nung küm 18 tashi MLA ka liasü aser Bihar assembly nungsa Opposition lennir ama inyak.
Mezüngbo Prasad ya shishilembar ka liasü saka 1967 küm Jan Sangh züngsem ka kümer yimtenren mapa nung ajemok aser iba sülen Sangh aser BJP nung menden balala nung mapa inyak.