Nagaland nung ali patta system tenzüktsü

Kohima, Metsüremi (March) 16 (TYO): Nagaland nung sen apuba melena ali alangzüka meyutetba khuret koktettsü atema state nung ali ozüngtem den patta system tenzüktsüla, ta Planning and Coordination and Land Revenue Minister, Neiba Kronu-i ashi.
“Naga nungertemi Arrla 371(A) mejangja. Iba nung Nagaland nung ali aser rongsentemji state nung alirtem meyong ta shia lir saka asenoki iba atema jungjunga bushitsüla aser tangari asen state nung temulung lemteta arua shishilembatettsü atema patta system ka tenzüktsü nüngdak” ta Kronu-i ashi.
Nagaland nung land revenue aser land records inyakyim melenshitsüla aser ali dak sendakba ozüngtem yangluba den Nagaland patta yanglutsüla. Naga entrepreneur tem aser zünger mapa manguba lanurtemi bank nungi teyari magiteter, kechiyong sen apuba melena ali alangzüka meyuteter, ta paisa shisem.
Sorkari Special Development Fund mesüra CM Corpus Fund ajanga sen lakh 2-3 agütsür saka iba jagi meperir kechiyong entrepreneur temi sen lakh 20-30 nüngdaker aser ali alangzüka meyutetba ajanga bank temi lenji maruteter, ta Kronu-isa ashi.
Nagaland nung ali indang ozüngtem lateta maliba ajanga asenok merenloker aser sorkari maneni subsidy magütsütettsü. Talisa subsidy agütsüba inyakyim ajanga Naga nunger aso ka tetsükdaktsü ajuruogo, ta paisa metetdaktsü.
Kodang Nagaland nung affidavit inyakyim toktsür ali indang ozüngtem den patta system tenzükdir, Naga nungertemi bank mesüra senotsü rejutem dang nungi teyari agitettsü, ta Minister-isa ashi.
Iba onük atema civil society tem den ajurutepa sendentem amentsü sentong lir. Asenoki iba ya memelenshira tangari Nagaland nung arua mapa meinyaktettsü, kechiyong Foreign Direct Investment and Externally Aided Projects atema social clearance nüngdaker, ta paisa ashi.
Planning and Coordination Department atema Kronu-isa ashiba agi, Cultural Hall, Multipurpose Parking at New NST aser Old Medical Directorate tem dena mapatongtem anendaka aliba ajak tenzüktsü.
Cabinet-i PWD aser Urban Development department tem nem tetuyuba agütsüogo. Sangtennü (Mongulbar) Assembly session amenba sülen cabinet senden ka mena liasü, ta paisa metetdaktsü.
“Nübortemi gari lenmang tajung aginüba atema onoki mapa inyaktsü” ta sorkari anogo 60 tsüngda district headquarter ajak nung lenmang yanglushitsü lemtetba atema Kronu-i nenshia metetdaktsü.
NDPPP-i aniba PDA sorkari anogo 100 aben minister shia inyakba mapatem meyipa reprangtsü aser yearly report ka adoktsü. Iba denji külemi mapa junga meinyakba minister tem indang osang Chief Minister-i reprangtsü. Onoki election nung temelenshi bener arutsü ta ayimoktsüba ama onoki tekaraba nung mapa inyaktsüsa akümtsü, ta Kronu-isa ashi.