BJP-i Andhra Pradesh atema bangzüng ka renemtsü: Madhav

New Delhi, Metsüremi 17 (Agencies): Tanü BJP general secretary, Ram Madhav-i Andhra Pradesh nüburtem nem angatetdaktsütsü atema party-i bangzüng ka renemtsü, ta metetdaktsü.
Andhra Pradesh-i par state nem maongka balaka agutsütsü atema akhangba dak sendakba nung BJP leniri iba o ya jembi.
BJP Tir, Amit Shah aser state unit BJP den senden ka amenba sülen Madhav-i, NDA sorkari Andhra Pradesh terenlok atema inyaker aser parnok nem tajangzük balala agutsütsü atema melunga lir, ta ashi.
“Onoki bangzüng ka renemtsü, aser iba bangzüngji ajanga Andhra Pradesh nüburtem dang iba onük nung onok tangatetba angatetdaktsütsü. Pai (Andhra Chief Minister) nübur atema bilemba ama onokia bilemtsür. Tesüiba küm pezü nung onoki aika inyaktsüogo,” ta paisa ashi.
“Tesüiba küm pezü nung onoki parnok atema inyaktsüba mapatem aser tarutsü nung inyaktsütsü aliba mapatemji Andhra Pradesh nüburtem nem metetdaktsütsü. Maongka balaka dak alia onoki aika inyaktsütsü melunga lir,” ta pai ashi.
AP nem maongka balaka magutsüba onük nung ajemdaker TDP-i BJP den küm pezü teloktep raksar NDA toktsüba sülen tang BJP leniri iba o ya jembir.
Centre sorkari Andhra Pradesh nem Special Category Status (SCS) magutsüba atema tejashi nung TDP-i NDA teloktep toktsüogo.
Andhra Pradesh nung tongti party ana- TDP aser YSR Congress nati yashi Lok Sabha nung Modi sorkar anema no-confidence motion benok, aser ibaji Congress aser Left züngsemtemia pusema liasü.