Tebu mesükba kinü tanur temang tajungba alir

Metsüremi 17, 2018 (Agencies): Kinü tanurtem tereprangtsü nung balaka majiteter. Saka tebu mesükba kinü tanur karbo temang nung tajangzük alir, ta researcher temi ashir.
Journal of Health Economics nung ashiba agi, kinü tanur asoba mapang tebu mesüker ya mapang timba tebu den alir aser parnok sor arishi küm ka ajungdang parnok temang tuluba aser tashi taitba alir.
“Tanur ka ainba nung tebu ya kanga tongtibang lir aser kasa mapang tanur temang nunga teyari angur,” ta Binghamton University, New York nung Professor Solomon Polachek-i ashi.
“Tanur tebu shibai kinü tanur ya tereprangtsü nung pa mesüka angur, pai kinü tanur ya pa indang ta tali angateter aser iba ajanga kinü tanur den mapang tali indoker,” ta Polachek-i ashi.
Item bushitetba ya kibong 715 nungi kinü tanurtem tetsü den kisüng aluba nungi asadangtetba lir.
Kinü tanur asodang tebu mesüker ya küm ka ajungdang temang tajungba akümer, aiba ajanga tebu mesükba ajanga tanur anepaluba nung tebui mapang tali indoker, ta sayur.
Tesem balaka nung aliba tebui par tanur pa mesükba den anogo 2.5 agi tali amunger, ta bushitet.
Iba bushitetba nung teraksa kibong nungi tebu kati tanur den mapang indokba indangbo meshiteter, ta shia lir.
“Kinü tanuri kondang tebu mesükdir tebui teti semdanga mapang indoker, aser iba ajanga tali anepalua tanur temang anepaluyim tali tejangjaba nung meteta akümer aser tanur ka ainba mapang temangi nüngdakbatem peritsür,” ta Polachek-i ashi.
Iba tebushitetba ajanga tesem balala nung aliba tebui par kinü tanur anepaluba nung temulung tali agütsüdaktsütsü aser kinü tanur temang tajungba akümtsü, ta ashir.