Süngyanglu ajungdokba

Tenyar Paul aliba lima nung alirtemji süngyanglu külemertem liasü. Aji oda, Efesa nungertemi kanga tushia külemba süngyanglu tsüngremji Diana liasü. Ibaji tobur tajung tetsür süngyanglu ka liasü. Parnoki iba süngyanglu tsüngremji tuluka yanglur tenla ki tajung ka nung ayu aser ibaji alima nung tesüngmangtsütem rongnung ka ta parnoki züngshi. Aji oda, Efesa nungertem ajakji süngyanglu külemer asünungji par lima nung süngyanglu yanglua ayokertemji kanga tajangzük ngua liasü. Iba ama mapang ka nung tenyar Paul Efesa limai arur amangba purtem ajurua parnok nem tanüla temeshi agizükdaktsü aser mangmangba purtem den Tsüngremi yimli indang jembia liasü. Atangji, Paul-i Efesa tonga marudangyongi yangji alirtem tia indang meteta dang liasü, saka pai Efesa nungertemi süngyanglu külemba anema mejembi mesüra maitsü aser matala, ajisüaka yangji orr nübortem dang Yisu Khrista temeim osang tajung indang sangdonga jajaba mapang nübortem aikati Yisu Khrista dak amang aser süngyanglu külemertem ajema aküm. Aji oda, Yisu Khrista dak amangertem o süngyanglu külemertem libaliro naji tema nungia reprangteta kenyongi balaka melenshia adok. Aji oda, kodang nübortemi pei kidang süngyanglu yur külemba anen, süngyanglu yanglua ayokertem mapa nung takoksa alutsü tenzük, kechiyong parnok dang nungi süngyanglu alirtem kanga ajema kümadok. Aji oda, süngyanglu ayokba ajanga takar akümertemi Tsüngrem temeim mangatet aser parnoki Yisu Khrista osang tajung magizüktet. Tanü asenok lima aser nübortema Paul mapang Efesa nungertem amaji aika lir. Atangji, Efesa nunger amaji asenoki hon aser taribi agi yangluba süngyanglu mekülemi alitsüa akok, saka asenoki Tsüngrem dang nungi taoba senotsü bilemer, ali kimong meimer, süoshi aser chiyongtsü penbur, alima tsütsü nüngtugu akümtsü tokteper. Yisu Khristaji kibur ta agizüka amangra, asenoki itemji meinyaktettsü aser ochimashi mapatem meinyaktettsü ta asenoki meteta lir, iba jagi asenoki item süngyanglutemji meindoktetter. Asenok taküm ya Paul mapang Tenyar mapa 19 nung shia aliba taribi atsünger Demetria, shibai pa tajangzük anguba lenmang meshibangnüba agi nübortem dang Pauli sayutsüngiba anema nokdaktsü ayongzük, pajiang mesük. Yi shibangba agi sen lenmang shibanger ta asenoki jembir, Sali moko meyokra asenok kibong memesütettsü amai asenoki bilemer, ochishia lira sen mauyatettsü tsübur, yimjung nung lira tashiyim agi rakzükratem mesütettsü ta shisabolur. Item süngyanglutem asen mulungjang nungi majungdoktetba ajanga asenok taküm, kibong aser alima kangshir. Tanü tensa Khristan-tem asoshi itemji tamang tongpang asütsü. Iba ama tensa mapang ka nung, Paul ama asenoka tasü itta nokdatsüsa asenok nema tashi agüja lir aser lenitsü atema tanüla temeshi yoka lir. Paul taküm ama asenoki tangar aija inyaktsü menüngdaker saka asen taküm aser jakla yimya agi tangar taküma dena melenshitsüsa asenok alitsüla aser jembitsüla. Efesa nung Demetriai aniba telok amaji asenok rongnunga süngyanglu meindoknertem alitsüa akok mesüra asenok anema nokdaker adoktsüa akok, saka asenok taküm nung Yisu Khrista jakla aser tanüla temeshi aliba jagi tangar mulungjang nunga mapa inyaktsü.