Changlang Battalion-i Arunachal nung Nongbu Singpho apu

Kohima, Metsüremi 17 (TYO): Security tensa tamajungba küma DAO DIVISION kübok Security Forces-i tensa tajungba akumtsü aser telungpurtem azüoktsü atema south Arunachal Pradesh nung operation maneni odar, ta tanü Col C Konwer PRO (Defence)-i sangdong ka ajanga metetdaktsü.
Iba dak sendakba nung Metsüremi (March) 17, 2018 anepdang yakta Changlang Battalion Security Forces-i Changlang District kübok Margherita tesem mita aodang ULFA(I) den inyaker Tai Singpho Security Force (TSSF) nungi Private, Nongbu Singpho, apu; telungpur kati amokmerena sen akhangtsü merangdar ta intelligence osang angazükba nung ajemdaker sepaitemi Sagunbari nung pa apu, ta sangdong nungsa shia lir.
Iba sülen asüngdangyaba mapang nung pai Tai Singpho Security Force (TSSF) aser ULFA(I) den inyakba nangzük; paisa 2014 küm nungi pa iba telok nungi shilem agiba aser Myanmar nung training agiba nangzük, ta kasa sangdong ajanga metetdaktsü.
Security Forces-i South Arunachal Pradesh nung maneni operation aoba ajanga telungpur telok balalai sen akhangba maparen raksatsüogo.