MP nungi Professors aser kaketshirtemi Nagaland semdang

Metsüremi 17, 2018 nü Dimapur Government college nung Madhya Pradesh nungi Professor tem aser kaketshirtemi  Dimapur Govt College nung tesayurtem aser kaketshirtem den tangokba noksa nung angur.

Dimapur, Metsüremi 17 (TYO): 2015 küm Ato kilonser, Narendra Modi-i tenzükba Centre sorkar mapatong ‘Ek Bharat Shrashtha Bharat’ project dak sendakba nung Madhya Pradesh nungi Professors pezü den kaketshir 12-i Nagaland semdanga lir.
Iba sentong ya Directorate of Higher Education, Nagaland-i yaritepa ayongzüka liasü.
Iba sentong ayonga akaba nükjidong ya India linük nung sobaliba balala ajungkettsütsü aser state balala tsüngda nüburtem tesendaktep lidaktsütsü atema lir.
Iba sentong ajangasa state tem tsüngda shisa balala angazükteptsü.
Tanü St John College, Dimapur nung Madhya Pradesh nungi semdanger team-i Tetso College aser Dimapur Govt College nungi kaketshirtem aser tesayurtem den shisalemsatepba sentong agiba den külemi cultural exchange programme ayonga agi.
Metsüremi (March) 18,2018 nü parnok Patkai Christian College, Chumukedima nung chapel service nung adentsü aser shisalemsatepba sentong agitsü.
Iba project kübok state ajak anana lemsaja lir aser küm piyong sentongtem agiyonga aoer. 2017 nungi 2018 küm atema Madhya Pradesh atema Nagaland aser Manipur na lemzükja lir.