Kohima nung “Beat Cancer: Run and Ride 2018” rally agi

Nagaland nung cancer adokba teraji moko lir

Kohima, Metsüremi (March) 17 (TYO): North East tesem nung küm shia cancer tapu balala 45,000 shi puteter aser iba khuret atema nisung 34-i moko achiba ajanga timtem bener arutsüba osang prokshitsü atema mapa ka tenzüka inyaker.
“Beat Cancer: Run and Ride 2018” rally ya Tata Trusts, Cachar Cancer Hospital aser Silchar Thumpers Enfield Club temi Voice of Tobacco Victims (VoTV), Tata Motors aser National Cancer Grid den yaritepa agir.
Metsüremi (March) 12, 2018 nü parnok nisung 34 ya motorbike 17 nung mener Assam kübok Silchar nungi apuso aser parnoki Shillong, Guwahati, Tezpur, Itanagar, Dibrugarh semdanger tanep Nagaland yimtiba Kohima tongogo.
Kohima nung parnoki cancer awareness atema kilometer 5 asemtepba sentong ka ayonga agi aser iba nung kaketshirtrem, tesayurtem aser biker temi shilem agi.
Naga Hospital nung sentong ka agidang Commissioner & Secretary of Health and Family welfare, Nagaland, R. Ramakrishnan-i ashiba agi, north east nung cancer tashidakji tebur dang nungibo tetsürtem dak teimba atonger.
Nagaland nunga küm shia cancer aketer 600-700 shi puteter. India nung cancer ya moko achiba ajanga teimba adoker, anungji lanurtem aser tanga teloktemi cancer anema mapa inyaktsüla, ta Ramakrishnan-isa ashi.
Sentong nung Cachar Cancer Hospital and Research Centre Director aser VoTV patron, Dr Ravi Kannan-ia o jembidang “iba rally ajanga cancer osang prokshitsü aser tekaraba nung putettsü osang prokshir” ta ashi.
India kübok tebur teimba dak cancer putetba Mizoram kübok Aizawl district nung lir aser tetsürtem dak teimba putetba Arunachal Pradesh kübok Papumpare district nung lir, ta Dr Ravi-isa metetdaktsü.
Nisungtemi cancer ya taneptsü manguba tashidak ka ta bilemer saka cancer ya noktangteter aser taneptsü angu. Cancer ajak nungi shilem 50 aser oral cancer noklang nung shilem 90 bo noktangtettsü akok, ta paisa shisem.
Teburtem dak cancer teimba adokbaji tekolak aser tekong nung lir aser tetsürtem dak tekolak aser tekong den cervical cancer aser breast cancer kanga puteter, ta paisa ashi.
Northeast nung cancer tashidak putetba rongnung 70% bo late stage nung ang puteter aser ibaji cancer yimya indang junga memetetba, anepaludak peria maliba aser tetsübu agi lir, ta Dr Ravi-isa shisem.
Kohima nung parnok Imphal-i apusoa ao aser idak nung jagi Aizawl-Agartala-i aotsü aser Metsüremi (March) 23 nü Silchar nung rally ji tembangtsü.