Finance Bill agizükba atema ashishiteper

Metsüremi (March) 13, 2018 nü Lok Sabha nung olemtep mesüra o atsütepba kecha melii dang minute 30 tsüngda Finance Bill 2018 agizüka ayuba ajanga linük nung senso aika aoksadaktsü aser nisung aikati iba inyakyim atema ashishiteper. Tan Parliament session tenzükba sülen opposition MP temi Lok Sabha aser Rajya Sabha naprong nung lungkak aitba ajanga Bill ka dang benoka magizükteti aru aser taoba Rasemnü (Bodbar) jia opposition-i lungkak taitdak nung Lok Sabha Speaker-i Sumitra Mahajan-i ‘guillotine’ ta ajaba inyakyim amshia Finance Bill ji agizüka liasü. Rongchii (April) 1, 2018 nungi tenzüktsü aliba Financial Year nungi amshitsü indang Finance Bill agizüktsü atema BJP-i par züngsem ajak session nung adentsü atema anogo asemnü whip ka agüja liasü. Lok Sabha nung BJP-i aniba National Democratic Alliance (NDA) pur nübo teimba lir. Ajisüaka, Lok Sabha Speaker-i kanga dang tongtipang bill ana- Appropriation Bill, 2018 aser Finance Bill 2018 ola vote ajanga dang agizüka ayuba nung ashishiteptsü keta lir, kechiyong shitakba agibo item Bill yabo mezüng Parliament nung benoker jungjunga olemtepa angatettepba sülen ang mesüra temelenshitem melenshiba sülen ang agizüktsüla. Taküm olemtep mesüra o atsütepba kecha melii dang Finance Bill agizükba ya Indian Parliamentary maparen nung tim mesüi inyakba jungkai adoka sayur. Tesüiba küm ishika Parliament nung senden mementeti meinprongba mesüra lungkak aitba inyakyim ya kanga bulua inyaka arur. Taküm-a opposition-i Parliament nung House anaprongla nung senden magidaktsüi lungkak aitba maneni dang arudar. Ajisüaka, tesüiba mapangtem nungbo Lok Sabha senden nung finance bill nung benoka aliba Union Budget atema olemtep agi aser o atsütepba liasü. Union Budget ya policy document ka lir aser iba ya sorkari inyakba welfare programme tem atema dang masü saka India nunger ajak atema tongtipang lir. Küm shia Lok Sabha nung agizükba Bill tem rongnung Finance Bill ya tongtipangtiba lir saka taküm Lok Sabha nung iba tongtipang Bill ya zübazüba dang agizükogo aser iba ya ajanga linük nung ozüng yangluba maparen tashi meiti aoba sayur. Iba atema shiba nem tai tongloktsütsü ta süra, ruling aser opposition nung aliba MP ajak nem aser ano political party tila ajak nungi MP tem dak tai tongloktsütsü. Sorkari finance bill atema o atsüteptsü mesüra olemteptsü memerangdangi dang Bill agizükba aser opposition tongtiba-ia Bill atema olemtep alitsü melena sorkar anema noktakbaji tongtipangba ta bilema inyakba atema parnok ajak dak tai tongloktsür. Ano, party tilatemia iba atema ola madokba atema kasa tebilemtsü abentsü. Democracy linük ka nung olemtep ajanga dang sorkar inyaksangshibatem len anir aser democracy ka nung o atsütepa jembibaji kanga tongtipang. Ajisüaka, tang Lok Sabha nung olemtep mesüra o atsütepba kecha melii dang Finance Bill agizükba ajanga democracy mashileni angatetba aser tim mesüi inyaksangshiba jungkai adoka sayur. Iba Bill nung bendangertemi political party tem nem senotsü teyari agütsüba nungi jenbutsü aser MP tem itasen ajungketba onüktem dena lir saka olemtep kecha melii dang odang agizüka yuogo. Hao iba anogo nunga Lok Sabha nung lungkak aittepa liasü saka sorkari olemteptsü memerangdangi Bill agizüka ayubaji tim masü. Ano külen Opposition-ia iba atema khuret balaka mebeni dang lungkak aitba manenbaji tim masü. Shitakba agibo MP tem ya ozüng yanglurtem lir aser parnok ya nübortemi shimtetba lir saka parnoki ibaji mangateti taoba Rasemnü (Bodbar) Lok Sabha nung tim mesüi inyakba ajanga parliamentary inyaksangshi aser democracy nung tarak tamajung kettsüogo.